«100 kúnde 10 myń shuńqyr» aktsııasy: Óskemendikter 200-den astam shuńqyrdy jamatty

ÓSKEMEN. QazAqparat – Óskemen qalasynyń turǵyndary «100 kúnde 10 myń shuńqyr» aktsııasy aıasynda 200-den astam shuńqyrdy jamatty, dep habarlaıdy QazAqparat tilshisi.

Qala ákimdiginiń málimetine súıensek, bıylǵy naýryz aıynyń aıaǵynan beri alǵash ret «100 kúnde 10 myń shuńqyr» aktsııasy bastaldy. Mundaǵy maqsat – bıýdjet qarajatynyń qaıda jumsalatynyn halyqtyń ózine sheshýge múmkindik berý, azamattyq qoǵam qalyptastyrý.

«Sol úshin @Oskemen_bot telegramm chat-boty ashylǵan. Óskemendikter telefonmen joldaǵy ózderi baıqaǵan shuńqyrdy fotoǵa túsirip, sonda jiberip otyrady. Al merdigerler birden shuńqyrlardy jamaǵan soń jumys nátıjesi jelide jarııalanady. Búgingi tańda qala turǵyndarynyń ótinishteri boıynsha 200-den astam shuńqyr jamaldy. Ótinishter áli de qabyldanyp jatyr», - delingen aqparatta.

Eske salsaq, osyǵan deıin Óskemende «100 kúnde 10 000 shuńqyr» aktsııasy iske qosylǵanyn habarlaǵan edik.