100 keli ziltemirdi eńserdi: elordalyq muǵalim 54 jasynda álem chempıony boldy
ASTANA. KAZINFORM – Astana qalasynyń Raıymbek batyr atyndaǵy №50 mektep-lıtseıiniń bastaýysh synyp muǵalimi Aıgúl Erjanova Mysyrda paýerlıftıng sportynan ótken ashyq álem chempıonatynda eki altyn medal ıelendi.
Mysyr astanasynda ótken ashyq birinshilikte elordalyq ustaz ziltemirdi jerden ilip tik kóterý saıysynda 100 kelini ońaı baǵyndyryp, rekord tirkedi. Atalǵan jarysqa 23 memleketten 2 000-ǵa jýyq sportshy qatysty.
Aıgúl Erjanova sporttyń bul túrimen 52 jasynda kásibı turǵyda aınalysa bastaǵan. Al oǵan deıin qolkúrespen, jeńil atletıkamen aınalysqan.
— Qazaqstan bul jarysqa birinshi ret qatysyp otyrǵan soń meni uıymdastyrýshylar basynda qytaılyq dep oılapty. Keıin rekord ornatqanymda Qazaqstannan kelgenimdi bilip, qurmet kórsetti, - deıdi chempıon.
Aıta keteıik, astanalyq muǵalim byltyr «Qazaqstannyń eńbek sińirgen ustazy» ataǵyn alǵan.
Bapkeri óziniń inisi — Aıbar Erjanov. Ol aýyr atletıkadan álem chempıonaty, Azııa, Eýropa birinshilikterinde jeńiske jetken.