100% qarjylandyrylǵan kınolar tabystyń 20%-yn qaıtarýy tıis - Nurqısa Dáýeshov
NUR-SULTAN. QazAqparat - 100% qarjylaı qoldaý kórsetilgen jobalar prokattaýdan túsken túsimniń 20%-yn Ulttyq kınony qoldaý memlekettik ortalyǵyna qaıtarýy tıis. Ortalyqqa qaıtarylǵan qarajattyń barlyǵy jańa jobalar óndirisine baǵyttalady. Bul týraly «Ulttyq kınony qoldaý ortalyǵy» Kommertsııalyq emes aktsıonerlik qoǵamynyń qyzmetine arnalǵan baspasóz konferentsııasynda aıtyldy, dep habarlaıdy QazAqparat tilshisi.
«Ulttyq kınony qoldaý ortalyǵynyń jumysy týraly toqtalyp óteıin. Bıyl qańtar aıynda qabyldanǵan kınematografııa týraly zań jobasyn ázirleý barysynda Frantsııa, Germanııa, Qytaı, Reseı, Ulybrıtanııa, AQSh, Kanada, Koreıa jáne taǵy da basqa jetekshi óndirýshi elderdiń zańnamasynyń oń tájirıbesi negizge alyndy», - deıdi «Ulttyq kınony qoldaý ortalyǵy» KEAQ Dırektorlar keńesiniń tóraǵasy Nurqısa Dáýeshov.
Onyń aıtýynsha, bul zań qazaqstandyq kınematografııanyń damýyna múmkindik beredi.
«Osy zań aıasynda «Ulttyq kınony qoldaý ortalyǵy» Kommertsııalyq emes aktsıonerlik qoǵamy quryldy. Ortalyqtyń maqsaty - Ulttyq fılmder shyǵarýǵa baǵyttalǵan memlekettik qarajatty tıimdi bólý. Ekinshi másele, ulttyq kınony memlekettik qarjylandyrýdyń jańa modelin engizý. Zań qabyldanǵanǵa deıin barlyq kartınalar prokatty qosyp alǵanda memleket esebinen tolyq kólemde qarjylandyrylǵan bolsa, jańa zań boıynsha memleket tarapynan tolyq kólemde joǵary áleýmettik mańyzy bar fılmder qarjylandyrylady. Basqa kommertsııalyq jobalar ınvestorlar men jeke kapıtaldy tartý arqyly ishinara qarjylandyrylady«, - deıdi ol.
Sondaı-aq, tóraǵa jańa zań jobasynda memleket jumsaǵan qarajatty qaıtaryp alý máselesi qaralǵanyn aıtty.
»Áleýmettik mańyzy bar fılmderdiń túsirilýine 100% qarjylaı qoldaý kórsetilgen jobalar prokattaýdan túsken túsimniń 20%-yn Ulttyq kınony qoldaý memlekettik ortalyǵyna qaıtarýy tıis. Qalǵan alýshylar qarjynyń paıyzdyq araqatynasyna sáıkes kólemde qarjyny qaıtaratyn bolady. Ortalyqqa qaıtarylǵan qarajattyń barlyǵy jańa jobalar óndirisine baǵyttalady«, - deıdi Nurqısa Dáýeshov.
