«100 qadam» energetıka salasynyń áleýetin arttyrady

ASTANA. QazAqparat - Kemeldi bolashaqtyń jospary - «100 naqty qadamnyń» «Indýstrııalandyrý jáne ekonomıkalyq ósim» atty bóliginde elektr energetıkasyn damytýǵa baılanysty birneshe mindetter qamtylǵan. Naqtyraq aıtqanda, elektr energetıkasy salasyndaǵy atqarylar is-sharalar áleýmettiń údesinen shyǵýy tıis. Búginde osy baǵytta birqatar aýqymdy ister iske asyrylýda.

Osy turǵyda «100 naqty qadam» Ult josparyndaǵy 50-qadam «Elektr energetıkasyn qaıtadan qurý», «Biryńǵaı satyp alýshy» modelin bekitý» mindetterin kózdeıdi. Bul óńirler arasyndaǵy elektr energııasynyń ártúrli tarıfterin retteýge múmkindik beredi.

Jasyratyny joq, elektr energııasy túrleriniń tarıfteri barlyq jerde birdeı emes. Osyǵan oraı, tutynýshylar tarapynan tarıfterdiń jıi ózgeriske ushyraýyna baılanysty narazylyqtar týyndaýy yqtımal. Sondyqtan, mundaı olqylyqtarǵa jol bermeý maqsatynda elektr energetıkasy salasyn ulǵaıta otyryp, «Biryńǵaı satyp alýshy» modeli engizilgeni jón. Qazirgi tańda elektr energetıkasy salasyn qaıta uıymdastyrý aıasynda QR Energetıka mınıstrligi salaǵa ınvestıtsııalar tartýdy yntalandyratyn jańa tarıftik saıasatty engizý jumysyn júrgizýde. Qýat óndiretin uıymdardyń arasynda básekelestikti damytý úshin elektr qýatyn satyp alý ortalyqtandyrylǵan saýda-sattyq arqyly júrgiziletin bolady. Sonymen qatar, qýatty satyp alý isimen Eseptik-qarjy ortalyǵy - Tikeleı uzaq merzimdi sharttar jónindegi biryńǵaı satyp alýshy aınalysatyn bolady. Bul ınvestorlarǵa jańa jınaqtaýshy qýattardy salýǵa jáne jumys istep jatqandar nysandardy keńeıtýge ketken salymdaryn qaıtarý kepildikterin alýǵa múmkindik beredi.
Sondaı-aq, 51-qadamda «Óńirlik energetıkalyq kompanııalardy (ÓEK) irilendirý» máselesi qoıylǵan. Bul mindetti iske asyrý energııamen qamtamasyz etýdiń senimdiligin artyrady, óńirlerge elektr energııasyn taratýdyń shyǵynyn tómendetedi, tutynýshylar úshin elektr energııasynyń aqysyn azaıtady. Osynyń ózi tutynýshy tilegine saı keletini talas týdyrmaıdy.
Al, Ult josparyndaǵy 52-qadam «Elektr energetıkasy sektorynda salaǵa ınvestıtsııa tartýdy yntalandyratyn jańa tarıf saıasatyn engizý» dep atalady. Árıne, tarıf qurylymy ózgertýdi talap etedi. Tarıfterde 2 qurylýshy erekshelenetin bolady: kúrdeli shyǵyndardy qarjylandyrý jáne elektr energııasy óndirisiniń aýyspaly shyǵyndaryn jabý úshin paıdalanylatyn elektr energııasy úshin tólenetin aqy belgilenedi. Bul shyǵyndy óteý ádisi boıynsha tarıfterdi bekitetin qazirgi ahýaldy ózgertýge múmkindik beredi.
Kórip otyrǵanymyzdaı, el ekonomıkasyn ilgeri damytýdyń basty tegershigine aınalǵan elektr energetıkasyn ońtaılandyrý joldary barshaǵa arnalǵan qazirgi zamanǵy memlekettiń Ult josparynda osylaısha kórinis tapqan. Endigi mindet - osy sharalardy dáıektilikpen is júzine asyrý.