«100 qadam»: Azamattardyń sot júıesine senimdiligi sýdıalardyń kásibıligine de kóbirek baılanysty - Sh. Núsipova
ASTANA. QazAqparat - Azamattardyń sot júıesine senimdiligi sýdıalardyń kásibıligine de kóbirek baılanysty. Bul týraly búgin jýrnalıstermen ótken brıfıngte Astana qalasy Mamandandyrylǵan aýdanaralyq ekonomıkalyq sotynyń sýdıasy Sholpan Núsipova málim etti.
«Memleket basshysy Qazaqstandy álemniń damyǵan otyz eliniń qataryna enýine baǵyttalǵan bes ınstıtýtsıonaldyq reformalardyń júzege asýyn qamtamasyz etetin «100 qadam» Ult josparyn bekitti. Bul jospar jańa tarıhı jaǵdaıda Qazaqstannyń memlekettigin nyǵaıtady. Osy ınstıtýtsıonaldyq reformanyń ekinshi baǵyty - zańnyń ústemdigin arttyrý. Bul rette azamattardyń ádilsotqa qoljetimdigin ońaılatý úshin sot júıesi ınstantsııalaryn ońtaılandyrý júrgiziledi, bes satyly sot júıesinen úsh satyly sot júıesine kóshetin bolamyz. Ekinshi másele azamattardyń sot júıesine senimin kóterý eń aldymen sýdıalardyń kásibıligine kóbirek táýeldi. Sondyqtan da, sýdıa laýazymyna kandıdattardy irikteý tetigi men biliktilik talaptary meılinshe qataıa túsedi», - deıdi Sh. Núsipova.
Onyń aıtýynsha, sýdıa laýazymyna kandıdattarǵa jas shegi 30 jylǵa deıin kóterilip, ondaǵy sot protsesine qatysý boıynsha jumys ótili bes jyldan kem bolmaýy talap etiledi. Sosyn sýdıa laýazymyna kandıdattar stıpendııasy tólenetin bir jyldyq tájirıbeden ótedi, sodan keıingi bir jyl synaq merzimi bolmaq.
«Budan bólek, sýdıalardyń eseptiligi kúsheıtiledi. Sýdıa etıkasynyń jańa kodeksi negizinde jeke jáne zańdy tulǵalardyń sýdıalar áreketine shaǵymdaný quqyǵy keńeıtilmek. Bul rette QR Joǵarǵy Sotynyń janynan arnaıy alqa qurylady. Onda eki komıssııa jumys isteıdi, onyń biri sýdıalardyń tártiptik is-áreketterin qaraıtyn bolsa, ekinshisi biliktilik talaptaryn tekseredi», - dedi sýdıa Sh. Núsipova.
