100-ge jýyq jylqyny barymtalaǵandar ustaldy - Almaty oblysy
TALDYQORǴAN. QazAqparat - Almaty oblysynda tártip saqshylary barymtashylar tobyn qolǵa túsirdi. Olar 100-ge jýyq jylqyny urlaǵan dep habarlaıdy QazAqparat tilshisi.
Qylmystyq top quramynda 26 men 46 jas aralyǵynda 5 azamat bolǵan. Olar Almaty oblysynyń Talǵar jáne Kegen aýdandary men Almaty qalasynyń turǵyndary bolyp shyqty.
Qylmystyq tekserý barysynda barymtashylardyń naqty úsh faktige qatysy bar ekeni dáleldenip otyr. Keltirilgen materıaldyq shyǵyn 26 mln teńgege baǵalandy. Barlyq úsh qylmys 2018 jyldyń qazan, qarasha aılarynda Kegen aýdanynda tirkelgen. Kúdiktiler Jalańash jáne Kishi Jalańash aýyly turǵyndarynan 87 bas jylqysyn aıdap áketken.
Almaty oblystyq polıtsııa departamenti baspasóz qyzmetiniń málimetinshe, qazirgi tańda QR QK 188-baby, 4-bóligi boıynsha sot aldy tergeý jumystary júrip jatyr.
Sondaı-aq, urlanǵan maldy izdestirý jalǵasýda. Tártip saqshylary maldyń satylǵan jeri men satyp alǵan adamdardy da anyqtaǵan.
