100-ge jýyq almatylyq qarjy pıramıdasynyń qurbany boldy
ALMATY. QazAqparat – Almaty turǵyndary aqshalaryn salǵan jeke kompanııaǵa jappaı shaǵymdandy, dep habarlaıdy QazAqparat tilshisi.
Qalalyq polıtsııa departamentiniń baspasóz qyzmeti málim etkendeı, 14 jeltoqsan kúni Medeý aýdandyq polıtsııa basqarmasyna qarjy uıymyna aqsha salǵan 99 adamnan ujymdyq aryz túsken.
Jábirlenýshilerdiń sózinshe, kompanııa basshysy salymshylardyń qarjysyn kóbeıtip beretinin syltaýratyp, aqsha jınap, qyzmet kórsetý boıynsha jeke kelissózder jasaǵan.
«Atalǵan fakt sotqa deıingi tergeýdiń biryńǵaı tiziliminde Qazaqstan Respýblıkasy Qylmystyq kodeksiniń 190-baby, 3-bólimi boıynsha tirkeldi. Іstiń mán-jaıyn anyqtaýǵa jáne kináli adamdardy jaýapkershilikke tartýǵa baǵyttalǵan qajet tergeý jáne jedel is-sharalar júrgiziledi»,- dep habarlady polıtsııadan.
Artynsha áleýmettik jelide almatylyq qarjy pıramıdasynyń dırektory bolýy múmkin degen er adamnyń vıdeosy tarady. Er adam eki jyl buryn kompanııa qurǵanyn aıtady. Qazirgi jaǵdaı onyń elde bolmaýyna baılanysty bolǵan. Er adam jaqyn arada Almatyǵa oralyp, paıyzben salynǵan aqshany qaıtaryp berýge ýáde berdi.
