100-ge tolǵan qyzylordalyq ardagerdiń qurmetine báıge men aqyndar aıtysy ótkizildi

QYZYLORDA. QazAqparat – Qyzylorda oblysy Qazaly aýdanynda turatyn qart maıdanger Qabaq Smaǵul júz jasqa toldy. Osyǵan oraı, aýdanda túrli mádenı is-sharalar uıymdastyryldy, dep habarlaıdy QazAqparat tilshisi.

Qart maıdenger Bekarystan bı aýylynda turady. Sondyqtan, mádenı sharalar aýyl ortalyǵynda ótkizildi. Jergilikti jurtshylyq «Ǵasyr jasaǵan maıdanger» atty jıyndy tamashalady. Onda aýdan ákimi Muhtar Orazbaev kópshilikti merekemen quttyqtap, ataýly meıram qarsańynda ǵasyr jasaǵan Qabaq Smaǵuldy mereıtoıymen quttyqtady.

Qart maıdangerge «Qazaly aýdanynyń qurmetti azamaty» ataǵy tabys etilip, qazaqy dástúrge saı ıyǵyna shapan jabyldy. Odan keıin Qyzylorda oblysy ákimi Nurlybek Nálibaevtyń quttyqtaýyn jetkizip, arnaıy syılyǵyn tartý etti. Sondaı-aq, QR Qorǵanys mınıstri Rýslan Jaqsylyqovtyń jáne ózge de azamattardyń quttyqtaýyn oqyp berdi.

Jergilikti jurtshylyqqa Qabaq Smaǵuldyń mereıtoıyna arnap shyǵarylǵan «Tamyry tereń báıterek» atty kitap tartý etildi.

Odan keıin kópshilik aýdan ónerpazdardyń ónerin tamashalap, aqyndar aıtysynyń kýágeri boldy. Mereıtoı sharasy kelesi kezekte aýdaryspaqqa ulasyp, at báıgesine jalǵasty.

Respýblıkalyq deńgeıde uıymdastyrylǵan báıgege Jambyl, Túrkistan oblystary, Jańaqorǵan, Shıeli, Jalaǵash jáne Aral aýdandarynan 50-den asa shabandoz keldi. Aýyzdyqpen alysqandardyń alamanyna tigilgen júldeniń jalpy qory – 3 600 000 myń teńge.

Foto: Qazaly aýdanynyń ákimdigi