100 esim: Arbada otyrsa da ózgelerge kómek kórsetetin - Eldos Baıalyshbaev

ASTANA. QazAqparat - «Qazaqstannyń 100 jańa esimine» engen Eldos Baıalyshbaev múmkindigi shekteýli bolsa da, on eki múshesi saý adamdar qoljetkize almaı júrgen jetistikterdi baǵyndyrǵandardyń biri. Ol «QazAqparat» HAA tilshisine ózi týraly aıtyp berdi.

Múgedekter arbasynda otyrǵan Eldos anasymen birge Taldyqorǵan qalasynda ońaltý oralyǵyn uıymdastyrǵan.

«Biz anamyz ekeýimiz Taldyqorǵanda ońaltý ortalyǵynyń jumysyn bastadyq. Sonymen birge, «Bolashaq» startapy arqyly «Alakól Asar» demalys bazasyn ashtyq. Búginge deıin 300 adam ońaltýdan ótip, onyń ishindegi 50-60 adam taıaqpen júre bastady. 100-ge jýyq adam ózdigimen qozǵalýdy úırenip, óz-ózine qyzmet kórsetýdi úırendi», - deıdi Eldos.

Belsendi jas jigit munymen toqtap qalmaı, kezekti márte paıdaly jobany bastap ketipti.

«Biz bıylǵy jyldyń sáýir aıynda «Avtoeriktilik» atty jobany bastadyq. Bul - múgedek jandarǵa kórsetiletin qaıtarymsyz kómek. Biz olarǵa kólikti qaıyrymdylyq negizde tapsyramyz», - deıdi ol.

Ońaltý ortalyǵyn oblystyq bılik qarjylandyrýda.

Eldos Baıalyshbaevtyń paıymdaýynsha, «Qazaqstannyń 100 jańa esimi» jobasyna shynynda da, biregeı adamdar engen.

«Qazaqstannyń 100 jańa esimi» jobasy týraly aıta otyryp, ózimniń aınalamda óte myqty jandardy kórip otyrǵanyma shyn júrekten qýanamyn. Olardyń ómirleri shynynda da, úlgi tutarlyq. Eńbegimniń joǵary baǵalanyp jatqanyna rızamyn», - deıdi Eldos.

Eske sala ketsek, QR Prezıdenti Nursultan Nazarbaev «Rýhanı jańǵyrý» baǵdarlamasy aıasynda uıymdastyrylǵan «100 jańa esim» jobasynyń 102 jeńimpazymen keshe kezdesken bolatyn. Qazaqstannyń týyn bıikke kótergen sportshylar men aq halatty dárigerler, metsenattyqpen kózge túsken beldi kásipkerler men ǵalymdar, mádenıet pen qoǵamdyq salada el aýzynda júrgen azamattar Elbasynyń jyly lebizine bólendi.