100 dombyrashy, 20 jas sýretshi: Elordalyq oqýshylar Otanǵa arnaǵan beınejoba usyndy
ASTANA. KAZINFORM — Respýblıka kúni qarsańynda Astana qalasy Esil aýdany ákiminiń apparaty men qalalyq Bilim basqarmasynyń qoldaýymen № 2 Óner mektebiniń oqýshylary «Bizdiń ún — OTAN» atty shyǵarmashylyq beınejoba daıyndady.
Jobanyń maqsaty — óner arqyly óskeleń urpaqtyń boıynda otansúıgishtik sezimdi qalyptastyrý, týǵan jerge degen qurmetti arttyrý, ulttyq qundylyqtardy dáripteý jáne el birligin nasıhattaý.
Beınejobanyń kórkemdik jelisinde óner mektebiniń dombyra synybynda oqıtyn ózge ult ókilderiniń Otan týraly dıalogy kórinis tapqan. Olar ortaq shańyraqtyń qadiri men Qazaqstanda ómir súretin túrli etnos ókilderin biriktiretin basty qundylyq — Otan týraly oı qozǵaıdy.
Dıalogtan keıin joba ulttyq ónerdiń qudiretimen jalǵasady. № 2 Óner mektebiniń 100-den astam dombyrashy oqýshysy qazaq halqynyń rýhyn, ulttyq bolmysy men eldik muratyn aıshyqtaıtyn «Er Turan» kúıin oryndaıdy. Kúıdiń kúmbirlegen úni arqyly jas ónerpazdar halqymyzdyń baı mýzykalyq murasyn ulyqtap, ulttyq rýhty asqaqtatady.
Sonymen qatar 20-ǵa jýyq jas sýretshi óz shyǵarmashylyǵy arqyly Qazaqstanǵa degen súıispenshiligin bildiredi. Olar elimizdiń tabıǵatyn, týǵan jerdiń sulýlyǵyn, beıbit ómir men jarqyn bolashaqqa degen senimdi beıneleıtin týyndylar usynady.
Mýzyka men beıneleý ónerin toǵystyrǵan bul joba jas urpaqtyń týǵan elge degen qurmetin óner tilimen jetkizetin shyǵarmashylyq bastamaǵa aınaldy.
Respýblıka kúni — memlekettiligimizdi aıshyqtap, eldigimizdi bekemdeıtin, ortaq Otanymyzǵa degen maqtanysh sezimin nyǵaıtatyn mereke. «Bizdiń ún — OTAN» beınejobasy osy qundylyqtardy jas urpaqtyń óneri arqyly dáripteýge baǵyttalǵan.
Aıta keteıik, Respýblıka kúni qarsańynda Astananyń barlyq mektebinde oqýshylarǵa arnalǵan biryńǵaı synyp saǵattary uıymdastyryldy. Sabaqtarda el tarıhy, egemendiktiń mańyzy men ulttyq qundylyqtar týraly aıtyldy.
