100 dollarlyq kýpıýralarda Tramptyń qoltańbasy paıda bolady
ASTANA. KAZINFORM – AQSh táýelsizdiginiń 250 jyldyǵyna oraı shyǵarylatyn 100 dollarlyq banknottarda qazynashynyń qoltańbasynyń ornyna prezıdent Donald Tramptyń qoltańbasy bolady, dep habarlaıdy DW.
Bul sońǵy 165 jyl ishinde alǵash ret bolyp otyrǵan jaǵdaı bolmaq.
AQSh Qarjy mınıstrligi beısenbi, 26 naýryz kúni habarlaǵandaı, AQSh-tyń táýelsizdiginiń 250 jyldyǵyna arnap shyǵarylatyn jańa 100 dollarlyq banknottarda el prezıdenti Donald Tramptyń qoltańbasy bolady. Bul ózgeris banknottardaǵy qazynashy qoltańbasyn almastyrady jáne sońǵy 165 jylda alǵash ret júzege asqaly otyr.
— Prezıdent Tramptyń basshylyǵymen biz buryn-sońdy bolmaǵan ekonomıkalyq ósimge, dollardyń uzaq merzimdi ústemdigine, sondaı-aq qarjylyq qýat pen turaqtylyqqa qaraı jyljyp kelemiz. Elimizdiń jáne prezıdent Donald Tramptyń tarıhı jetistikterin atap ótýdiń eń aıqyn joly — onyń esimin dollar banknottaryna jazý, — dedi AQSh Qarjy mınıstrliginiń basshysy Skott Bessent.
Buǵan deıin AQSh-tyń Beıneleý óneri jónindegi federaldyq komıssııasy eldiń 250 jyldyǵyna oraı qazirgi prezıdent beınelengen, judyryǵyn túıip turǵan 24 karattyq altyn monetany shyǵarýdy biraýyzdan maquldaǵan bolatyn. Monetada «Bostandyq» (Liberty) degen jazý bar.
2025 jyldyń qazan aıynda Tramp ákimshiligi Beıneleý óneri komıssııasynyń barlyq múshelerin qyzmetten bosatyp, olardyń ornyna Aq úı basshysyna adal adamdardy taǵaıyndaǵan.
Sońǵy ýaqytta Tramptyń esimi qaı jerlerde paıda boldy
Jeltoqsan aıynda AQSh Memlekettik departamenti AQSh Beıbitshilik ınstıtýtyna Tramptyń esimin berdi. Bul sheshim ony «el tarıhyndaǵy eń uly kelissóz júrgizýshi» retinde máńgi este qaldyrý maqsatynda qabyldanǵany aıtyldy. Sonymen qatar Vashıngtondaǵy Djon F. Kennedı atyndaǵy Oryndaýshylyq óner ortalyǵynyń ataýy ózgertilip, ol «Donald Dj. Tramp jáne Djon F. Kennedı atyndaǵy Memorıaldyq oryndaýshylyq óner ortalyǵy» dep ataldy.
Sol aıda AQSh prezıdenti Áskerı-teńiz kúshteri úshin «Tramp» dep atalatyn jańa úlgidegi eki áskerı keme salý josparyn jarııalady. Aq úı basshysynyń aıtýynsha, bul kemeler gıperdybystyq zymyrandarmen, elektrlik relstik zeńbirektermen, qýatty lazerlik júıelermen jáne qazirgi ýaqytta ázirlenip jatqan ıadrolyq oqtumsyǵy bar qanatty zymyrandarmen jabdyqtalady.
Sonymen qatar, 2025 jyldyń basynda prezıdenttik qyzmetke qaıta oralǵannan keıin Donald Tramp alǵashqy kúni-aq Meksıka shyǵanaǵyn «Amerıka shyǵanaǵy» dep qaıta ataý týraly jarlyqqa qol qoıǵan. Associated Press agenttigi bul ataýdy qoldanýdan bas tartqannan keıin, onyń tilshilerine Aq úıdiń Ovaldy kabınetine jáne prezıdenttik ushaq Air Force One-ǵa kirýge shekteý qoıylǵan. Al Google Maps bul ózgeristi óz kartalarynda engizgen.