100-den astam jas desantshy alǵashqy ret parashıýtpen sekirdi
ASTANA. KAZINFORM — «Jańa Іle — Ońtústik» sekirý alańynda Qonaev garnızonynyń desanttyq-shabýyldaý brıgadasynyń áskerı qyzmetshileri oqý-jattyǵý maqsatyndaǵy parashıýtpen sekirýlerdi oryndady, dep habarlaıdy Qorǵanys mınıstrliginiń baspasóz qyzmeti.
Desanttyq daıyndyqqa barlyǵy 120-dan astam áskerı qyzmetshi qatysty. Onyń ishinde 100-den asa merzimdi áskerı qyzmetshi alǵash ret parashıýtpen sekirdi.
Desanttaý Mı-17 tikushaǵynan 800 metr bıiktikten júzege asyryldy. Jerge qonǵannan keıin áskerı qyzmetshiler bólimshelerdiń desanttan keıingi is-qımyldaryn pysyqtaı otyryp, taktıkalyq normatıvterdi oryndaýǵa kiristi.
Alǵashqy sekirýdiń aldynda áskerı qyzmetshiler áýe-desant daıarlyǵynyń tolyq kýrsynan ótti. Arnaıy oqý-jattyǵý kesheninde olar áýe kemesinen shyǵý tártibin, parashıýtti basqarýdy, jerge durys qoný tásilderin jáne tótenshe jaǵdaılar kezinde áreket etý algorıtmin meńgerdi. Daıyndyqtyń sońǵy kezeńinde qaýipsizdik talaptaryn saqtaý boıynsha baqylaý nusqamasy ótkizildi.
— Árbir sekirýdiń aldynda jan-jaqty daıyndyq júrgiziledi. Áskerı qyzmetshiler teorııalyq bilimdi de, praktıkalyq daǵdylardy da tolyq meńgerýi tıis. Óıtkeni desanttaýdyń qaýipsizdigi olardyń saýatty is-áreketine tikeleı baılanysty. Tek daıarlyq baǵdarlamasyn tolyq ári sátti aıaqtaǵannan keıin ǵana jeke quramǵa parashıýtpen sekirýge ruqsat beriledi, — dedi 32363 áskerı bóliminiń áýe-desant daıarlyǵy bóliminiń aǵa ofıtseri, gvardııa maıory Danııar Ábdirahmanov.
Alǵashqy derbes sekirý jas desantshylar úshin kásibı qalyptasýdyń mańyzdy kezeńine aınaldy. Igerilgen mashyqtar praktıkalyq sabaqtar men taktıkalyq daıarlyq barysynda jetildirilip, áskerı qyzmetshilerdiń jaýyngerlik mindetterdi oryndaý daıyndyǵyn kúsheıte túsedi.
Áýe-desant daıarlyǵy Desanttyq-shabýyldaý áskerleriniń jaýyngerlik daıarlyǵyndaǵy negizgi baǵyttardyń biri bolyp sanalady. Ol áskerı qyzmetshilerdiń tózimdiligin, psıhologııalyq ornyqtylyǵyn, óz kúshine degen senimin qalyptastyryp, kez kelgen kúrdeli jaǵdaıda tıimdi áreket etý qabiletin damytady.
Budan buryn Qazaqstan desantshylary 26 jyldyq belesti baǵyndyrǵanyn jazǵanbyz.
