100-den astam Shymkent turǵyny saılaýda baıqaýshy bolýǵa ótinish bildirdi
Búgin qalada Parlament Májilisi jáne jergilikti máslıhat depýtattary saılaýynyń ádil ótýin qamtamasyz etý maqsatynda baıqaýshylardy daıyndaý barysy jóninde arnaıy brıfıng ótti. Onda qala boıynsha 312 saılaý ýchaskesi bar ekeni aıtyldy. Jaýaptylardyń sózinshe, saılaý ýchaskeleriniń 293 ashyq, 19 jabyq bolyp tabylady. Saılaýdaǵy baıqaýshylardy 3 negizgi shtab daıyndaýda. Olardyń qatarynda beıpartııalyq erikti baıqaýshylar men Qazaqstan Azamattyq Alıans qaýymdastyǵynyń, «Shymkent qalasy kásipodaqtar ortalyǵy» aýmaqtyq kásipodaqtar birlestigi janynan qurylǵan shtabtary bar.
«Búgingi tańda shtabqa 100-den astam azamat ótinish bildirip, tirkeldi. Bizdiń negizgi maqsatymyz – kásibı baıqaýshylardy daıyndaý. Tirkelgen baıqaýshylarmen saılaýdyń zańdylyqtary, baıqaýshynyń negizgi mindetteri men ádebi taqyrybynda semınarlar, sıtýatsııalyq jaǵdaılarǵa baılanysty trenıngter ótilýde»,-dedi Beısenkúl Jaqsybekqyzy.
Sonymen qatar saılaýǵa QR Kásipodaqtar federatsııasynyń atynan Shymkent qalasy boıynsha 293 táýelsiz baıqaýshy 8 sala boıynsha tirkelgen. Olar: densaýlyq saqtaý, bilim, kásipkerlik qoǵamdyq qyzmet kórsetý jáne jol-avtokólik, kommýnaldyq sharýashylyq pen energetıka mádenıet, sport, aýyl sharýashylyǵy salalarynyń mamandary.
«Bizdiń basty mindetimiz – taza saılaý ótkizý. Obektıvtilik, adaldyq, ashyqtyq, jaýapkershilik, jarııalylyq, saıası beıtaraptyq jáne kásibılik prıntsıpterin ustaný! Basqa uıymdardyń, táýelsiz baqylaýshylardyń jumysyn qurmetteý, olarmen yntymaqtastyq ornatý maqsatymyz bolyp tabylady»,- dep atap ótti Shymkent qalasy Azamattyq Alıans aımaqtyq shtabynyń tóraıymy Baıan Jandosova.