100-den astam kólik polıtseıi jańa qylmystyq-protsessýaldyq kodeks boıynsha synaq tapsyrdy
ASTANA. QazAqparat - Kóliktegi ishki ister departamentiniń (tergeý, anyqtaý, ákimshilik, krımınaldyq, kóshi-qon polıtsııasy jáne esirtki bıznesine qarsy kúres basqarmasynyń qyzmetkerleri men basshylary 2015 jylǵy 1 qańtardan bastap qoldanysqa enetin QR Qylmystyq jáne Qylmystyq is júrgizý kodeksteriniń jańa erejeleri boıynsha bilimderin tekserýden synaq tapsyrdy.
Synaqtyń maqsaty - kólik polıtseılerin jańa zańnamalarmen jumys jasaýǵa daıyndaý.
Test túrindegi synaqty ótkizý úshin Departament bastyǵynyń buıryǵymen arnaıy komıssııa quryldy. Testileý arnaıy baǵdarlama engizilgen kompıýtermen jabdyqtalǵan kabınette ótkizildi.
Bul is-shara jańa qylmystyq zań jáne sot óndirisi, ákimshilik quqyqbuzýshylyq týraly zań, qylmystyq jazalaýdyń atqarý júıesine kóshý boıynsha Elimizdiń Prezıdentimen bekitilgen Byryńǵaı memlekettik jospar aıasynda uıymdastyryldy.
Jańa kodeksterde qylmystyń barlyq túrlerimen kúresýdiń tıimdi joldary qarastyrylǵan, ásirese onda balalar men jasóspirimderdiń quqyǵyna qatysty kez kelgen qylmys túrleri qatań jazalanady.
Adam ólimine qatysty emes aýyrlyǵy ortasha jáne orta deńgeıli qylmystarǵa kólemdi aıyppul bekitilgen.
Aǵymdaǵy jyldyń tamyz aıynan qarashaǵa deıin synaqqa daıyndyq jumystary júrgizilip, jańa kodeksterdi zerdeleý boıynsha semınar-keńester, beınekeńester men dárister uıymdastyryldy. Sondaı-aq, jańa quqyqtyq aktilerdi qabyldaý barysynda problemalyq máselelerdi ózara talqylap, zańdardy tıimdi qoldaný maqsatynda nusqaýlar men sharalar qabyldandy.
Testileýdiń nátıjesinde synaqqa qatysqan Departament apparatynyń 130 qyzmetkeri, onyń ishinde tergeý, anyqtaý, ákimshilik, krımınaldyq, kóshi-qon polıtsııalary, esirtki bıznesine qarsy kúres qyzmetkerleri, sonymen qatar jańa zańnamalarǵa sáıkes sotqa deıingi tekserýmen aınalysatyn olardyń basshylary ózderiniń daıyndyqtaryn kórsetti, dep habarlaıdy Kóliktegi ІІD baspasóz qyzmeti.
