100-den astam qazaqstandyq «Jibek Joly» týrıstik poıyzymen jolǵa shyqty
ASTANA. KAZINFORM – Búgin Almatydan 100-den astam jolaýshy «Almaty – Túrkistan – Tashkent – Samarqan – Buhara – Almaty» baǵyty boıynsha júretin «Jibek Joly» týrıstik poıyzymen saparǵa shyqty. Týrdyń uzaqtyǵy – 5 kún.
Poıyz zamanaýı ári jaıly otandyq óndiristiń vagondarynan jasaqtalǵan. Interer ulttyq naqyshta bezendirilip, dástúrli oıý-órnektermen aıshyqtalǵan. Quramda úsh kýpelik jáne bir meıramhana vagony bar.
«Jolaýshylar tasymaly» AQ baspasóz qyzmeti málimetinshe, baǵyt boıynda týrıster Qazaqstan men Ózbekstannyń mádenı jáne tarıhı ortalyqtaryna aıaldap, ǵasyrlar qoınaýynan syr shertetin jádigerlermen tanysady. Sapar barysynda olar Túrkistandaǵy Qoja Ahmet ıAsaýı kesenesi men kóne Otyrar qalashyǵyn, Samarqandaǵy Ámir Temir kesenesi men áıgili Regıstan alańyn, Buharadaǵy Ark qamaly men Lıabı-Haýz alańyn, Tashkenttegi Tóle bı kesenesi men Hazret Imam memorıaldyq keshenin tamashalaıdy.
Týrpaketke poıyzben sapar, kásibı gıdterdiń súıemeldeýi, barlyq ekskýrsııalyq bıletter men transferler tolyq qamtylǵan. «Jibek Joly» týrıstik poıyzy «Jolaýshylar tasymaly» AQ bastamasymen jáne «Ózbekstan temir joldarynyń» qoldaýymen uıymdastyryldy.
Bul joba Qazaqstannyń halyqaralyq týrıstik áleýetin arttyryp qana qoımaı, eki el arasyndaǵy mádenı baılanystardy nyǵaıtýǵa jáne óńirdiń tarıhı murasyn keńinen tanytýǵa serpin beredi.
Aıta keteıik, «Salamatty Qazaqstan» medıtsınalyq poıyzy Pavlodar oblysynyń shalǵaıda ornalasqan 6 eldi mekenin aralap shyqqan.