100-den astam iz-tússiz joǵalǵan jáne «ólgen» azamattar belsendi ómir súrgen - Bas prokýratýra

ASTANA. QazAqparat - QR Bas prokýratýrasy Quqyqtyq statıstıka jáne arnaıy esep komıteti sońǵy 3 jylda iz-tússiz joǵalǵan nemese óldige sanalǵan tulǵalar týraly azamattyq is sheshimine saraptama júrgizdi, dep habarlady qadaǵalaýshy organnyń baspasóz qyzmetinen.

Bas prokýratýra málimetterine qaraǵanda, sońǵy 4 jyldyń ishinde bul sanattaǵy sottar qaraǵan ister 21 paıyzǵa ósip, 979-dan 1186-y iske deıin artqan.

«Monıtorıng barysynda prokýrorlar sottar iz-tússiz joǵalǵandar ne bolmasa ólgender dep tanylǵan 112 azamattyń is júzinde belsendi ómir súrip kelgendigin anyqtady. Іz-tússiz joǵalǵan nemese óldi dep sanalǵan azamattar osy aralyqta avtokólik quraldaryn tirkep, memlekettik shekarany kesip ótken. Ákimshilik jaýapkershilikke tartylyp, túrli qyzmetter alý úshin halyqqa qyzmet kórsetý ortalyqtaryna júgingen. Olardyń jalaqysynan mindetti zeınetaqy jarnasy ustalyp otyrǵan», - delingen habarlamada.

Máselen, Astana qalasy Almaty aýdandyq sotynyń sheshimimen 2003 jyly J. esimdi azamattyń jubaıynyń ótinishi boıynsha ol iz-tússiz joǵalǵan dep tanylyp, al 8 jyldan keıin óldi dep jarııalanǵan.

Degenmen, tekserý barysynda osy jyldar ishinde atalǵan azamattyń týǵan ólkesi Soltústik Qazaqstan oblysynda turyp jatqany, qazirgi ýaqytta aýyldyq mektepterdiń birinde dırektor bolyp jumys isteıtindigi anyqtalǵan. Buǵan qosa, áli azamat óldi dep jarııalanǵannan keıin 2 márte ákimshilik jaýapqa tartylǵan.