100 bala Afrıka asyp ketti me: Syrtqy ister mınıstrligi Darhan Qydyráliniń faktilerin joqqa shyǵardy

ASTANA. KAZINFORM – Syrtqy ister mınıstrliginiń resmı ókili Aıbek Smadııarov senator Darhan Qydyráliniń depýtattyq saýalynda aıtylǵan keıbir málimetterdi teriske shyǵardy.

«Sheteldikter asyrap alǵan bala 18 jasqa deıin Qazaqstan azamaty bolyp qala beredi. Ony bizdiń sheteldegi konsýldar kómektesip, baqylap júredi — arnaıy baǵdarlama bar. Biraq 18-ge tolǵannan keıin ol qaı eldiń azamattyǵyn alatynyn ózi sheshýi kerek. Eger 18-den keıin sol eldiń azamattyǵyn alsa, biz eshqandaı áreket jasaı almaımyz, óziniń jeke sheshimi. Biraq 18 jasqa deıin asyrap alǵan ata-analar konsýlǵa esep berip turýy kerek. Al baǵana siz aıtyp otyrǵan „birneshe bala týraly aqparat joq“ degen málimet shyndyqqa sáıkes kelmeıdi. Óıtkeni barlyq bala boıynsha aqparat jınap otyramyz. Árıne, keıbir kezde bir mekenjaıdan basqa mekenjaıǵa kóship ketip, aqparat bolmaı qalýy múmkin», — dedi Syrtqy ister mınıstrliginiń resmı ókili.

Onyń aıtýynsha, qazaq balalary shetelge alǵash jiberile bastaǵanda «tek batys elderine berilsin» degen talap bolǵan.

«Sonymen qatar „qazaq balalaryn biraz ekzotıkalyq elderge alyp ketti“ degen de aqparatty oqydym. Olaı emes. Óıtkeni bizde kezinde toqsanynshy jyldary „balalardy tek batys elderiniń ókilderine beretin“ talap bolǵan. Batys elderiniń azamattary sol elderde dıplomat bolyp jumys isteýi múmkin. Solar asyrap alǵan. Al afrıkalyq elderge biz balalardy bermeımiz», — dedi Aıbek Smadııarov.

SІM resmı ókili qazirgi tańda 18 jasqa deıingi 1993 bala konsýldyq esepte turǵanyn jetkizdi.

«Senator Darhan Qydyráli júzden asa balany Afrıka elderine asyrap alyp ketti dedi. Ol aqparat ótirik pe?» dep naqtylady BAQ ókili.

«Ol aqparatty qaıdan alǵanyn bilmeımin. Bizdegi bar málimetke sáıkes, Afrıka elderine bala bergen joqpyz. Shyndyqqa janaspaıdy», — dedi Aıbek Smadııarov.

Eske salsaq, senator Darhan Qydyráli Ońtústik Afrıka eline ketken 30 baladan habar-oshar joq ekenin málim etken.