100-den asa jekemenshik emhana almatylyqtarǵa tegin qyzmet kórsetedi
ALMATY. QazAqparat - Bıyl Almaty turǵyndaryna kepildendirilgen tegin medıtsınalyq kómekti 185 medıtsınalyq mekeme kórsetetin boldy. Olardyń 104-i jekemenshik emhana, dep habarlaıdy QazAqparat tilshisi.
«Sońǵy 2 jylda medıtsınalyq kómek qyzmetin memlekettik tapsyrys aıasynda kórsetetin jekemenshik mekemelerdiń sany eki esege artty. Bıyl qalalyqtarǵa 77 emhana qyzmet kórsetedi. Olardyń ishinde 38 mekeme jekemenshik», - dedi «Áleýmettik medıtsınalyq saqtandyrý qorynyń» basshysy Tileýhan Ábildaev Interfaksta ótken jıynda.
Onyń aıtýynsha, bul kórsetkish jyldan jylǵa artyp keledi. Bıyl jekemenshik emhanalardyń qataryna taǵy 11 mekeme qosyldy. Bul óz kezeginde kezekti azaıtyp, jalpy tájirıbedegi dárigerlerge júktemeni azaıtady.
«Eger, adam úıinen qashyq jerdegi emhanaǵa baryp tirkelse, ol keıbir tegin qyzmetterdi ala almaıdy», - dedi ol.
Sondaı-aq, Almaty qalalyq Qoǵamdyq densaýlyq basqarmasy basshysynyń orynbasary Ásel Bısenbaeva dárigerlerge júktemesin azaıtý úshin bıyl 88 jańa mekeme ashylatynyn habarlady.
«Bul - dárigerlerdiń fýnktsıonaldy mindettemelerin sapaly atqara alýy úshin qajetti shara. Dárigerler óziniń biliktiligin de kótere alady», - dedi Ásel Bısenbaeva.
Onyń aıtýynsha, qazir densaýlyq saqtaý salasynda tsıfrlandyrý qaryshtap damyp jatyr.
«79 medıtsınalyq uıym qaǵazsyz qujat aınalymyna kóshti. Búginde 1,5 myń elektrondy tólqujat jasaldy», - dedi ol.
Aıta ketý kerek, bıyl «Medıtsınalyq áleýmettik saqtandyrý qory» KEAQ almatylyq emhanalarmen 105,2 mlrd teńgege kelisimshart jasasty.
