100-den asa kompanııa elorda ákimdigine sý tartý júıesindegi óz tehnologııalaryn tanystyrady
ASTANA. QazAqparat - Búgin Astana ákimdiginde halyqaralyq sarapshylardyń qatysýymen «Sý tartýdyń ózekti máseleleri: Aǵyndy sýlardy tazartý. Nóser jáne drenajdy káriz» taqyrybynda halyqaralyq konferentsııa ótýde.
«Qala da tiri aǵza sııaqty únemi ózgerip, zamanmen birge jańaryp otyrady. Bul rette Astana qysqa ýaqyttyń ishinde álemge tanymal, barsha halyq maqtan tutatyn qalaǵa aınaldy. Qazir elordamyzdy jaıly qalaǵa aınaldyrý jumystary júrip jatyr. Sol úshin de búgin sizdermen birge qalada jaýynǵa baılanysty týyndaıtyn máselelerdiń tıimdi joldaryn talqylaıtyn bolamyz», - dep atap ótti konferentsııa jumysyn ashqan qala ákimi Áset Isekeshev.
Sonymen qatar ol árbir baǵytta úzdik tehnologııalyq sheshim ázirleý úshin álemniń aldyńǵy qatarly tájirıbesin eskere otyryp, taqyryptyq josparlar ázirlenetindigin atap ótti.
«Halyqaralyq baıqaýlar uıymdastyrylady ári biz mindetti túrde oǵan úzdik kompanııalardy tartatyn bolamyz. Sol sebepti josparlanǵan sheshimderdiń aýqymdyǵyn eskerer bolsaq,Astana otandyq jáne sheteldik kompanııalarǵa ózderiniń tehnologııalaryn kórsetýge jáne bizdiń jobalarymyzdy júzege asyrýǵa qatysýǵa biregeı múmkinidk jasaıdy. Biz kóptegen jobalardy memlekettik-jeke seriktestik negizinde júzege asyramyz. Bizge 100-den astam kompanııa óz tehnologııalaryn tanystyrady», - dedi qala basshysy.
Aıta keteıik, qazirgi ýaqytta Astana qalasynyń ákimdigi halyqaralyq ınstıtýttar, ınjenerler, sarapshylar toptarymen birlesip sý tartý máselelerin keshendi túrde sheshý úshin nóser káriz júıesin ary qaraı damytý baǵdarlamasyn ázirleýde.
