Áýeden 100-den asa parshıýtpen sekirgen desantshy Memleket basshysynyń nagradasyn aldy
ALMATY. KAZINFORM — Almaty áýejaıynda Desanttyq-shabýyldaý áskerleriniń áskerı qyzmetshileri Memleket basshysynyń qolynan joǵary nagradaǵa ıe bolǵan áýe-desanty daıyndyǵy jónindegi nusqaýshy leıtenant Baljan Musataeva saltanatty jaǵdaıda qarsy aldy.
Halyqaralyq áıelder kúni qarsańynda Qazaqstan Prezıdenti Qasym-Jomart Toqaev Baljan Musataevaǵa Baýyrjan Momyshuly atyndaǵy II dárejeli «Aıbyn» ordenin tabys etti. Bul syılyq oǵan erekshe eńbegi, erligi men Otanǵa degen adaldyǵy úshin berildi.
Áriptesteri leıtenant Musataevany qoshemetpen qarsy alyp, gúl shoqtaryn syılady. Qurmet qaraýyl rotasy saltanatty sharanyń sánin keltirdi.
— Bul marapat meniń ǵana jetistigim emes. Men ony elimizdiń qorǵanys qabiletin nyǵaıtýǵa óz úlesin qosqan Qazaqstan Desanttyq-shabýyldaý áskerleri men Qarýly kúshteriniń barlyq áıeliniń janqııarlyq eńbegin baǵalaý dep esepteımin, - dedi Baljan.
Baljan Musataeva — parashıýt júıesin ushyrý jelisinde óz betinshe jumys isteýge, sondaı-aq ony baqylaý men tekserýge quqyǵy bar Desanttyq-shabýyldaý áskerlerindegi áýe-desanty daıarlyǵyn júrgizetin birden-bir áıel nusqaýshysy. Ol júzden asa áýeden parashıýtpen sekirgen.