100-den asa adamǵa qııanat jasaǵan qyzdar ustaldy
ASTANA. QazAqparat - 2014 jylǵy 31 naýryzda Qarjy polıtsııasy agenttigi Ott jáne Aıtbaevaǵa qatysty aldyn-ala sóz baılasqan top bolyp asa iri kólemde alaıaqtyq áreketter jasaý faktisi boıynsha qylmystyq is qozǵady.
Olar 2013-2014 jyldary Astana qalasynda 100-den asa adamdy aldap, nesıelerin jaýyp beremiz degen syltaýmen ekinshi deńgeıli bankterde jańa nesıelerdi rásimdeýge kóndirgen. Nesıege alynǵan aqshalaı qarajat pen taýarlardy ózderi ıemdenip otyrǵan.
Atalǵan kezeńde 100-den asa adamnyń atyna jalpy somasy 112 mln.teńgeden asa qaıtarymsyz taýarlyq jáne aqshalaı nesıe alynǵan. Sot sheshimimen Aıtbaeva qamaýǵa alyndy, al Ott asyraýynda eki balasynyń bolýyna baılanysty eshqaıda ketpeý týraly qolhat alyndy. Qylmystyq is tergelýde. «Azamattardyń nazaryn Aıtbaeva Ásemgúldiń ózin «Ásel», «Madına» dep tanystyrǵanyna aýdaramyz», - delingen qarjy polıtsıasynyń habarlamasynda. Atalǵan tulǵalardyń is-áreketinen japa shekken barlyq tulǵalardy qarjy polıtsııasy organdaryna kelesi telefondar boıynsha habarlasýyn suraımyz: 8 (7172) 90-90-40; +7 701-5270754
