100 bıýdjettik joba tsıfrlyq teńgemen iske asyrylady – UB tóraǵasy

ASTANA. KAZINFORM – Aldaǵy ýaqytta 100 bıýdjettik joba tsıfrlyq teńgemen iske asyrylady. Bul týraly Ulttyq bank tóraǵasy Tımýr Súleımenov aıtty.

- Tsıfrlyq teńge jaıly birneshe ret aıttyq. Jalpy, tsıfrlyq teńgeni kúndelikti qoldanysta kóretin bolamyz. Biraq, birinshi baǵyt – Úkimettiń, memlekettiń qarajatyn jemqorlyqsyz, taza, ashyq túrde paıdalaný. Sol baǵytta 270 mlrd tsıfrlyq teńge shyǵardyq. Mysaly, Ulttyq qordyń qarajaty esebinen iske asqan «Dostyq-Moıynty», «Taldyqorǵan-Úsharal» jobalary tsıfrlyq teńgemen qarjylandyryldy. Tsıfrlyq teńgeni qoldanýdyń eń basty baǵyty – bul memlekettik qarajatty durys paıdalaný, - dedi ol Ulttyq bankte ótken brıfıngte.

Onyń atap ótýinshe, aldaǵy ýaqytta kem degende 100 bıýdjettik jobany tsıfrlyq teńgemen qarjylandyrýǵa qatysty Úkimetpen kelisim bar.

- Jeke jumys tobyn qurdyq. Ulttyq bank tarapynan men, al Úkimet tarapynan Serik Jumanǵarın (Premer-Mınıstrdiń orynbasary – Ulttyq ekonomıka mınıstri) basqarady. 100 jobany tsıfrlyq teńgemen iske asyramyz, - dedi Tımýr Súleımenov.

Buǵan deıin Qazaqstan qor bırjasynda tsıfrlyq teńge qoldanylýy múmkin ekenin jazǵan edik.