100 basym mamandyq anyqtalady - bilim mınıstri
ASTANA. QazAqparat - QR Bilim jáne ǵylym mınıstri Kúlásh Shámshıdınova 100 basym mamandyqty anyqtaýdy kózdep otyr, dep xabarlaıdy QazAqparat tilshisi.
Mınıstrdiń aıtýynsha, 20 ilgeri joǵary oqý orny men 180 zamanaýı kolledjdi anyqtaý úshin QR Eńbek jáne xalyqty áleýemettik qorǵaý mınıstrligimen birlesip, 100 basym mamandyq anyqtalady.
«Qoǵammen, jumys berýshilermen aqyldasa otyryp, bilim berý uıymdaryn anyqtaýdyń negizgi krıterııleri belgilenedi. Ýnıversıtetter men kolledjder tizimi anyqtalyp, olardyń bilim baǵdarlamalary ekonomıkanyń talaptaryna saı ózektendiriledi. Al anyqtalǵan 100 basym mamandyqtarǵa sáıkes qajetti jabdyqtar toptamasy bekitiledi. Kolledjderdiń oqytýshylary men óndiristik oqý sheberleriniń biliktiligin arttyrý kýrstary qarastyrylyp otyr. Oqý protsesine sheteldik mamandardy tartý kózdelgen», - dedi K.Shámshıdınova Úkimettiń búgingi otyrysynda.
Aıta keteıik, otyrysta QR Prezıdenti Nursultan Nazarbaevtyń «Nur Otan» partııasynyń XVIII sezinde bergen tapsyrmalary talqyǵa salyndy.
QR Bilim jáne ǵylym mınıstri Kúlásh Shámshıdınova bilim salasynda 500 myńǵa tarta adamnyń jalaqysyn kóterýdi kózdeıdi.
«Bilim berý salasyndaǵy jalaqysy tómen qyzmetkerlerdiń eńbekaqysyn ulǵaıtý dıfferentsıaldy túrde 30 protsentke deıin júzege asatyn bolady. Bilim salasynda 500 myńǵa tarta adamnyń jalaqysy ósedi dep kútilýde. Olardyń qatarynda mektepke deıingi uıymdar men ınternattardyń tárbıeshileri, olarlyń kómekshileri, metodıster, áleýmettik pedagogtar, balabaqsha men kolledj psıxologtary, qosymsha bilim berý uıymdarynyń qyzmetkerleri, kitapxanashylar, vojatyılar, býxgalterler, is júrgizýshiler, eden jýýshylar, kúzetshiler, ot jaǵýshylar, santexnıkter men elektrıkter sııaqty basqa da texnıkalyq qyzmetkerler bar. Qazirgi kezde QR Eńbek jáne xalyqty áleýmettik qorǵaý mınıstrligimen qyzmetkerlerdiń sanattaryn jáne jalaqysyn arttyrý kólemin naqty anyqtaý jumystary júrgizilýde», - deıdi K.Shámshıdınova. 
Budan bólek, jańa mınıstr bilim reformasy týraly aıtty.
