«100 aýrýhana» jobasyn jalǵastyrýǵa úshjyldyq bıýdjetten 71,4 mlrd. teńge qarastyryldy

Búgin QR Parlamenti Májilisinde ótken Úkimet saǵatynda Densaýlyq saqtaý mınıstri Salıdat Qaıyrbekova osylaı málim etti.

Baıandama barysynda Memleket basshysy N. Nazarbaevtyń 2012 jylǵy 27 qańtardaǵy Úkimettiń keńeıtilgen otyrysynda júktegen naqty tapsyrmalaryna toqtalǵan mınıstr Salıdat Qaıyrbekova, qazirgi ýaqytta Elbasy tapsyrmalaryn sapaly oryndaý úshin barlyq sharalar qamtylyp otyrǵanyn atap ótti.

«Memleket basshysy tarapynan aıtylǵan ádil synnyń biri «100 aýrýhana qurylysy» jobasyn júzege asyrýdaǵy olqylyqtarǵa qatysty bolatyn. Biz ondaı kemshilikterdi túzetýge kirisip jatyrmyz. Naqtyraq aıtsaq, «100 mektep pen 100 aýrýhana qurylysy» jobasy aıasynda densaýlyq saqtaýdyń 103 nysany qarastyrylǵan edi. Onyń 99-y jergilikti, 4-eýi respýblıkalyq deńgeıde bolatyn. 2012 jylǵy 1 qańtardaǵy jaǵdaı boıynsha atalǵan 99 nysannyń 59-ynda qurylys tolyǵymen aıaqtaldy», - deıdi mınıstr. Onyń aıtýynsha, bekitilgen úshjyldyq bıýdjette «100 aýrýhana» jobasyn jalǵastyrý úshin 71,4 mlrd. teńge qarastyrylǵan. Onyń ishinde jergilikti deńgeıdegi nysandarǵa 62,6 mlrd. teńge bólinip otyr.

«Osylaısha 2012-2014 jyldary jáne odan keıingi kezeńde densaýlyq saqtaý salasynyń 40 nysanyn aıaqtaý kútiledi. Onyń ishinde 2012 jyly - 9, 2013 jyly - 10, 2014 jyly - 2 nysan, al 23 nysan odan keıingi jyldary qarastyrylady», - deıdi mınıstr S. Qaıyrbekova.