«100 aýrýhana» baǵdarlamasy boıynsha tapsyrmalardy aıaqtaý aldaǵy úsh jyldyq bıýdjet múmkindigine oraı memlekettik-jeke áriptestik aıasynda qaralady - E. Orynbaev

ASTANA. 13 qarasha. QazAqparat - «100 aýrýhana» baǵdarlamasy boıynsha tapsyrmalardy aıaqtaý aldaǵy úsh jyldyq bıýdjet múmkindigine oraı memlekettik-jeke áriptestik aıasynda qaralady. Bul týraly búgin Májilistiń jalpy otyrysynda «2013-2015 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zań jobasyn talqylaý barysynda vıtse-premer Erbol Orynbaev málim etti.

Toqtala ketetin jaıt, talqylaý barysynda depýtat Maıra Aısına Elbasynyń asa mańyzdy retinde tapsyrǵan «100 mektep» pen «100 aýrýhana» baǵdarlamasy jyl ótken saıyn durys júzege asyrylmaı kele jatqanyn aıtyp, osy baǵdarlama merzimi boıynsha 2011 jyly aıaqtalýy tıistigin alǵa tartty. «Jobalanǵan júz densaýlyq nysanynyń 64-i ǵana berildi. Mektep salasynda da jaǵdaı máz emes», - degen depýtat M. Aısına bundaı olqylyqqa qaramastan eshqandaı basshy jaýapkershilikti almaǵanyn aıtty. «Aqyr aıaǵy Úkimet osy baǵdarlamany qashan aıaqtaıdy?», - dep surady ol.

Óz kezeginde QR vıtse-premeri Erbol Orynbaev «100 mektep» baǵdarlamasynyń oryndalǵanyn, alaıda úsh aýysymmen, apatty jaǵdaılarda oqytatyn mektepter máselesi sheshilmeı otyrǵanyn aıtty. Al ol máseleler aldaǵy jyldyń bıýdjetterine qaraı sheshimin tabatyn bolady. «100 aýrýhana» - shyǵyny kóp baǵdarlama. 64 nysan berilgenimen, qalǵany aldaǵy úsh jyldyq bıýdjet múmkindigine oraı memlekettik-jekemenshik áriptestik boıynsha qaralady», - deıdi E. Orynbaev. Onyń aıtýynsha, baǵdarlama aldaǵy eki-úsh jyl ishinde sheshimin tabatyn bolady.