100 áskerı men 300 oqýshy sap túzeý arqyly qazaqstandyqtardy merekemen quttyqtady
TALDYQORǴAN. QazAqparat - Taldyqorǵanda 100 áskerı jáne 300 joǵary synyp oqýshylary sap túzeý arqyly «QR QK 25!» tańbalaryn beıneledi.
Osyndaı fleshmob arqyly uıymdastyrýshylar Qazaqstan Respýblıkasy Qarýly Kúshteriniń 25 jyldyǵyna erekshe tartý jasady, dep habarlaıdy QazAqparat tilshisi.
Erekshe fleshmobtyń ótýine oblystyq Qorǵanys isteri jónindegi departament pen óńirlik kommýnıkatsııalar qyzmetiniń ókilderi uıytqy boldy.
Shara maqsaty - QR Qarýly Kúshteriniń bedelin arttyrý jáne nyǵaıtý, jastarǵa áskerı-patrıottyq tárbıe berý, qazaqstandyq armııa qatarynda áskerı qyzmet ótkerýdiń bedelin kúsheıtý. Aktsııa aıasynda «Áskerge shaqyrý kúni» uıymdastyrylyp, Almaty oblysynyń 40 azamaty Qarýly Kúshter qataryn tolyqtyrdy. Jetisýlyq jastar Aqmola oblysyndaǵy Áýe qorǵanysy kúshteriniń 44813-áskerı bóliminde otan aldyndaǵy boryshyn óteıtin bolady.
Saltanatty sharaǵa Almaty oblysynyń ákimdik ókilderi, Qorǵanys isteri jónindegi departamenttiń basshylyǵy, Qarýly Kúshterdiń ardagerleri, Áskerı prokýratýranyń, «Nur Otan» partııasynyń ókilderi, sondaı-aq bolashaq sarbazdardyń ata-analary men týǵan-týystary qatysty.
Jalpy bıylǵy kóktemde merzimdi áskerı qyzmetke Almaty oblysynan 2 myń jas shaqyrylady.
