10 jylda Qazaqstanǵa 608 myń adam qonys aýdardy
ASTANA. 13 sáýir. QazAqparat - Sońǵy 10 jylda Qazaqstanǵa 608 myń adam keldi. Budan bólek, kerisinshe 668 myń adam elden ketti. Bul týraly búgin Astanada ótken brıfıngte QR Statıstıka agenttiginiń tóraǵasy Álıhan Smaıylov málim etti.
Tóraǵanyń aıtýynsha, 2011 jyly kóshi-qonnyń ońtaıly saldosy qalyptasyp, bul óz kezeginde 5,1 myń adamdy qurady. Máselen, ótken jyly Qazaqstanǵa 38 myń adam qonys aýdarsa, 32 myń adam kóship ketken.
Elge turaqty meken etýge kelgenderdiń 18,8 myńy áıelder bolsa, 19,9 myńy er azamattar. Atalǵan erlerdiń jas aralyǵy 25-29-da, al názik jandylar 20-24 jas aralyǵynda. 2011 jyly respýblıkadan kóship ketkenderdiń 72 paıyzy orystar, 8 paıyzy ýkraındar, 1,8 paıyzy belarýstar, 2,3 paıyzy tatarlar, sondaı-aq 4,5 paıyzy qazaqtar.
«Elimizge qonys aýdarǵandardyń jalpy úlesinde qazaqtardyń sany 70,3 paıyzdy, orystar - 12,2 paıyzdy jáne ýkraındardyń úlesi 1,2 paıyzdy qurady», - dedi tóraǵa.
