10 jylda elimizde balalar úıiniń sany 2,4 ese qysqardy - Aımaǵambetov

NUR-SULTAN. QazAqparat – Sońǵy 10 jyldyń ishinde elimizdegi balalar úıleriniń sany 2,4 ese qysqardy Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Balalar úıine qatysty aıtar bolsam, bul óte mańyzdy mindet. Men sońǵy 10 jylǵy derekterdi ǵana aıtaıyn. Sońǵy 10 jyldyń ishinde balalar úıleriniń sany 210-nan 89-ǵa qysqardy. Ózderińizde aıtarlyqtaı ilgerileý bar ekenin kórip otyrsyzdar. Eger 2010 jyly balalar úılerinde 14 myń bala tálim-tárbıe alsa, búginde olardyń sany 4 myńnan sál ǵana asady», - dedi mınıstr QR Prezıdenti janyndaǵy Adam quqyqtary jónindegi komıssııa otyrysynda.

Onyń atap ótýinshe, bul - búkil memlekettik apparattyń azamattyq qoǵammen birge júrgizgen jumysynyń úlken nátıjesi.

«Respýblıkalyq málimetter bazasy quryldy. Otbasylyq balalar úıi, otbasylyq úlgide tálim-tárbıe berý jumys istep tur. Bala asyrap alýdy da damyta tústik. Jeke bastamalar, máselen «Ana úıi» syndy ınstıtýttar balalardy balalar úıinen alyp, otbasylaryna ornalastyrady. Oslaısha, búginde bul baǵytta úlken ózgeristerdi kórip otyrmyz», - dedi Ashat Aımaǵambetov.