10 jylda 11 myńnan astam turǵyn-úı nysandary jóndelmek
ASTANA. 15 qyrkúıek. QazAqparat /Arman Asqarov/ - Elimizde 10 jyldyń ishinde 80 myńnan astam shaqyrymdy quraıtyn jylý, elektr jáne gaz jelileri, sondaı-aq 11,5 myń kóppáterli turǵyn-úı nysandaryn tolyǵymen jóndeý shyǵý josparlanyp otyr.
Bul týraly búgin Astanada ótken jıynda «Turǵyn-úı kommýnaldyq sharýashylyqty damytý jáne jańartýdyń qazaqstandyq ortalyǵy» AQ-nyń Monıtorıng jáne zertteý departamentiniń dırektory Madına Mýrsakına málim etti.
Onyń habarlaýynsha, búginde elimizdiń kommýnaldyq ınfroqurylymy kúrdeli jóndeýdi qajet etedi. Jylý jelileriniń tozyǵy - 63 paıyz, elektr energııasynyń nysandary - 73 paıyz, al gaz qubyry kesheninde bul kórsetkish 54 paıyzdy qurady. Bıyl «Turǵyn-úı kommýnaldyq sharýashylyqty damytý jáne jańartýdyń qazaqstandyq ortalyǵy» AQ júrgizgen zertteý kórsetkendeı, Aqtóbe, Qostanaı, Oral, Taldyqorǵan, Taraz, Qaraǵandy, Qyzylorda jáne Shymkent qalalaryndaǵy jylý qubyrlary 42-80 paıyzǵa tozǵan. «Jalpy, 2011-2020 jyldary aralyǵynda kommýnaldyq ınfroqurylymdy jańartý jumysyna 636 mlrd.-tan astam teńge bólinedi. Osy ýaqyttyń ishinde 80 myńnan astam shaqyrymdy quraıtyn jylý, elektr jáne gaz jelileri jóndeletin bolady. Al 2015 jylǵa deıin bul jospardyń 24,4 myń shaqyrymyn oryndap shyǵý josparlanǵan», - deıdi M.Mýrsakına.
Osydan keıin turǵyn-úı salasynyń tehnıkalyq jaǵdaıyna toqtalǵan ol elimizdegi kondomınımým nysandarynyń 32 paıyzy nemese turǵyn-úıdiń 50 mln. sharshy metr kúrdeli jóndeýdi qajet etetindigin jetkizdi. Al osy nysandardyń 2 paıyzy apattyq jaǵdaıda bolǵandyqtan, olardy tez arada buzý qajet. «Jalpy, 10 jyldyń ishinde 11,5 myń kóppáterli turǵyn-úı nysandaryn tolyǵymen jóndeý kózdelip otyr. Ol úshin bıýdjetten 359 mlrd. teńge bólinedi», - deıdi M.Mýrsakına.
