10 jylda 1 mln. 335 myń adam UBT-dan ótti - Bilim mınıstri
ASTANA. 10 maýsym. QazAqparat - Bıyl biz Ulttyq biryńǵaı testileýdi Qazaqstanda onynshy ret ótkizip otyrmyz.
Osy 10 jyl ishinde elimizdiń 1 mln. 335 túlegi Ulttyq biryńǵaı testileýden ótti. Bul barlyq qazaqstandyq mektep túlekteriniń 80 paıyzyn quraıdy. Búgin BAQ ókilderine UBT nátıjesi boıynsha eksklıýzıvti suhbat bergen Bilim jáne ǵylym mınıstri Baqytjan Jumaǵulov osylaı málim etti.
«Árıne, osy jyldar ishinde UBT-ǵa túrli qadamdar boldy. Eń bastysy, biz ulttyq biryńǵaı testileý arqyly áleýmettik mańyzdy fýnktsııalardyń oryndalatynyna basa mán berdik. Al jetildirý barysynda bizdiń túlekterimizdi baǵalaýdaǵy adamı faktordy aralastyrmaý máselesine, sybaılas jemqorlyqqa erekshe nazar aýdaryldy. UBT-ny jetildirýge qatysty mynadaı úsh mańyzdy quramdas bar ekeni belgili. Birinshisi, biz on jyl ishinde asa obektıvti baǵalaýǵa qol jetkizdik. Ekinshiden, joǵary bilimge teń ári bárine birdeı qoljetimdilik qamtylyp otyr. Azamattar óz aýdanynan, óńirinen alysqa barmaı-aq testileýge qatysatyn múmkindikti ıelendi», - dedi B. Jumaǵulov.
Onyń sózine qaraǵanda, bıyl jalpy alǵanda UBT joǵary deńgeıde ótti. Aldyn ala ázirlikter barlyq óńirlerde qamtylyp, synaq sharalary atqaryldy. «UBT jaqsy deńgeıde ótýine eń aldymen jergilikti atqarýshy organdar, quqyq qorǵaý organdarynyń ókilderi, BAQ, úkimettik emes uıymdar belsene atsalysty. Jalpy, demografııalyq jaǵdaıǵa sáıkes, 2013 jyly mektepterden bitirip shyqqan túlekter sany byltyrǵa qaraǵanda 14 myńǵa az boldy», - dedi B. Jumaǵulov.
