10 jyl ishinde jastar arasyndaǵy jumyssyzdyq 5 ese tómendedi - Serik Ábdenov

ASTANA 7 aqpan. QazAqparat - Sońǵy 10 jylda jastar arasyndaǵy jumyssyzdyq 5 ese tómendedi. Bul týraly búgin Eńbek jáne halyqty áleýmettik qorǵaý mınıstrliginiń keńeıtilgen alqa májilisinde atalǵan vedomstvonyń basshysy Serik Ábdenov málim etti.

Onyń sózine qaraǵanda, sońǵy 10 jylda jumyspen qamtylǵandardyń sany ósip qana qoımaı (6,7 mln. adamnan 8,5 mıllıonǵa deıin), sonymen qatar onyń sapalyq qurylymy da ózgerdi.

«Eger de 2002 jyly jaldamaly jumysshylar qurylymynda jastardyń úlesi 20 paıyzdy qurasa, qazirgi kezde 30 paıyzdan asyp otyr»,-dedi mınıstr.

Atap aıtqanda, jastar arasyndaǵy jumyssyzdyq 5 esege tómendegen, ıaǵnı 2002 jylǵy 17,3 paıyzdan 2012 jyly 3,8 paıyzǵa deıin azaıdy.