10 jyl ishinde Qazaqstanda 1300 adam quldyqtan qutqarylǵan
ASTANA. QazAqparat - 10 jyl ishinde Qazaqstanda adam saýdasynyń qurbanyna aınalǵan 1300 adam qutqarylǵan eken. Bul týraly búgin Astanada eńbek mıgratsııasy jəne adam saýdasyna qarsy memlekettik organdar men halyqaralyq uıymdardyń ózara əreketi taqyrybynda ótip jatqan jıyn barysynda Mıgratsııa jónindegi halyqaralyq uıymnyń baǵdarlamalar jónindegi assıstenti Jumajan Joldasbekov məlim etti.
"2004-2015 jyldar aralyǵynda Qazaqstan Respýblıkasynda 1328 adam quldyqtan qutqaryldy. Bul adamdarǵa əleýmettik, medıtsınalyq kómek kórsetildi", - dep habarlady J.Joldasbekov.
Sarapshylardyń aıtýynsha, qarııalardy kútetin, bala baǵatyn, úı tazalap, jekemenshik nysandardy salatyn, sondaı-aq as úıdiń jumysyna tartylatyn mıgranttardy tabý da, jazalaý da qıyn. Sebebi, olar jeke adamnyń úıinde turady jəne eń qaýiptisi - quldyqqa túsý qaýpi de kóp. Mysaly, Astana qalasy boıynsha Ózbekstan men Qyrǵyzstannan kelgen úsh adam quldyqtan qutqarylǵan eken.
