10 jyl boıy jumyssyz júrgen qostanaılyq ákimnen kómek surady
QOSTANAI. QazAqparat - 10 jyl boıy jumyssyz, baspanasyz júrgen jetim - Marat Býchıev qala ákiminen kómek surady, dep habarlaıdy QazAqparat.
Marat Býchıevti jeti jasynda ata-anasy Qarabalyq aýdanynan ákelip, Qostanaıdaǵy aqyl-esi jetilmegen jetim balalarǵa arnalǵan №2 mektep-ınternatyna tapsyryp ketken. Mektep-ınternatty bitirgen soń, atalǵan oqý ornynyń yqpalymen, Qostanaıdaǵy turmystyq qyzmet kórsetý kolledjine túsip, aıaq kıim tigý mamandyǵyn alyp shyqqan. Marattyń aıtýynsha, ol osy mamandyqpen jumys istemegen, aıaq kıim jóndeý qolynan kele de qoımaıdy, ebi joq.
«Sharasyzdyqtan túrli qurylys oryndarynda jegilip, bazarlarda júk túsirip, qara jumystar jasap, tıyn-teben taýyp keldim. Turǵylyqty jerim bolmaǵandyqtan, ár kúni ár jerde túnep júrdim. Bir kúni qolymdaǵy dıplomymdy da joǵaltyp aldym. Múmkindik bolsa, sol dıplomdy qaıtadan qalpyna keltirgim keledi. Ne kerek, jaǵdaıymdy baıandap qala ákiminen kómek suraǵym keldi», - dedi Marat Býchıev QazAqparat tilshisine.
Osylaısha, 26 jastaǵy jigit Qostanaı qalasynyń ákimi Bazyl Jaqypovtyń esep berý kezdesýine kelip, jaǵdaıyn aıtty.
«Jıynnan soń maǵan Qostanaı jylý energetıkalyq kompanııasynyń dırektory Asqar Bekpaǵanbetov jaqyndap, kómek beretinin jetkizdi. Qaladaǵy kópqabatty úılerdiń podezderinde túnep júrgenimdi estip, jatyn oryn taýyp berdi. Buǵan qosa ol kompanııanyń jylý qazandyǵy mashınısi qyzmetin usyndy. Ózimdi jaqsy maman retinde kórsetsem deımin. Qazir meniń ómirim kúrt ózgerdi. Bir kezderi óz-ózime qol jumsaýǵa da bel býǵanmyn. Bastysy ómirden túńilmeý qajet», - dep bólisti Marat.
