10 jyldan keıin «QazAtomÓnerkásiptiń» ýran óndirý kórsetkishi tómendeýi múmkin

ASTANA. KAZINFORM – «Samuryq-Qazyna» qorynyń qoǵamdyq keńes otyrysynda «QazAtomÓnerkásip» ulttyq atom kompanııasynyń tabysty jumysy neshe jylǵa sozylatyny týraly boljamdar talqylandy.

Qoǵamdyq keńes músheleri kompanııa qazirgi tabysty tsıkldi uzarta túsý úshin ne istep jatqanyn suraǵan.

- Bizdegi málimet boıynsha, ózimizge belgili biraq kelisimsharttarǵa engizilmegen qosymsha ken oryndaryn qospaǵannyń ózinde óndiretin ýran qory 25 jyldan astam ýaqytqa jetedi. Onyń ústine biz jańa ken qorlaryn iske alyp jatyrmyz. Osylaısha siz atap otyrǵan merzim uzara túsedi. Árıne árbir taý-ken ýchaskesinde biz qorytyndy barlaý júrgizemiz. Igerilip jatqan ýchaskelerge japsarlas bloktarǵa qosymsha barlaý júrgizý kerektigi kelisimsharttarymyzda da kórsetilgen. Qorymyz jarııa kórsete alatyn kólemnen áldeqaıda kóp ekenin ǵana aıta alamyn, - dedi ol.

Keńes otyrysynda «QazAtomÓnerkásip» 10 jyldan keıin ýran óndirýdiń sharyqtaý shegine jetetini de aıtyldy. Kompanııa basshylyǵy osy qysqa merzimde ýran qoryn barlaýǵa barynsha kóp qarjy jumsaýdy kózdep otyr. Qoǵamdyq keńes tóraǵasy Bolat Jámishev osy qysqa ýaqytta barlaýǵa barynsha kúsh salý kerek degen usynys ta aıtty.

- Biz barlaýǵa arnalǵan qarajatty 3 ese arttyrdyq. Ózimizdiń geologııalyq barlaýǵa jaýapty kompanııamyz bir mezette alty ýchaskede barlaý júrgizip jatyr, - dedi kompanııa basshysy.

Buǵan deıin Atom energetıkasy jónindegi agenttik tóraǵasy Almasadam Sátqalıev Qazaqstanadǵy alǵashqy AES qurylysy qalaı júrip jatqanyn aıtqan bolatyn.