10 jylda alty premer-mınıstr: Bernem brıtandyqtardyń úmitin aqtaýǵa ýáde berdi
ASTANA.KAZINFORM - 56 jastaǵy Endı Bernem dúısenbi kúni Ulybrıtanııanyń sońǵy onjyldyqtaǵy altynshy premer-mınıstri atanady, dep habarlaıdy Kazinform agenttiginiń Londondaǵy tilshisi.
Kır Starmer búgin tańerteń Daýnıng-strıttegi qoshtasý sózin aıtqannan keıin, Bernem túske taman Korol III Charlzben kezdesedi. Al ol jańa úkimet qurýdy resmı túrde tapsyrady.
Manchesterdiń burynǵy meriniń aldynda birqatar kúrdeli máselelerdi sheshý mindeti tur, eń aldymen ekonomıkalyq qıyndyqtar. Ol búgin mınıstrler kabınetin jarııalaýy tıis.
Onyń komandasy tilshilerge premer-mınıstr retindegi alǵashqy sózinde Bernem elge úmit syılaýǵa ýáde beretinin aıtty.
Ol qazir jeńiske jetý emes, mańyzdysy ádildik pen Ulybrıtanııadaǵy jaǵdaı týraly oılaný ýaqyty ekenin málimdedi.
Sonymen qatar, premer-mınıstr 2024 jyldan beri bılikte kele jatqan leıborıstik partııasyna degen senimdi qalpyna keltirý boıynsha óz basymdyqtaryn belgileıdi
Bernem sonymen qatar sońǵy on jylda Daýnıng-strıtke kelgen altynshy adam ekenin «tolyq túsinetinin» atap ótti. Ol premer-mınıstrlerdiń buryn-sońdy bolmaǵan aýysýy turaqty jáne jaýapty saıasattyń qajettiligin kórsetetinin aıtty.
Ol qazirgi sátti «oılaný jáne sheshim qabyldaý» ýaqyty dep sıpattaıdy, Ulybrıtanııa óziniń aldynda turǵan qıyndyqtardy shynaıy moıyndaýy kerek ekenin, sonymen birge búkil álemde tıimdi basqarýdyń úlgisi bolyp sanalatyn el bola alatynyn dáleldeýi kerek ekenin málimdedi.
Іshki saıasattyń basymdyqtaryna qatysty Bernem saıası turaqtylyq adamdardyń ómirin aıtarlyqtaı jaqsartýǵa ákelýi kerek ekenin atap ótip, brıtandyqtarǵa beıbit jáne senimdi ómir súrýge kóbirek múmkindik berýge mindettenetinin aıtty. Ol óz sózin optımıstik habarlamamen aıaqtap, Ulybrıtanııa bolashaqqa taǵy da úmitpen jáne birlik sezimimen qaraı alatynyn jetkizdi.
Buǵan deıin Ulybrıtanııanyń bolashaq premer-mınıstri úkimetiniń basym baǵyttaryn ataǵan bolatyn.
