10 jylda 16 mlrd teńge jumsalǵanymen joldardyń tsıfrlyq kartasy áli ázirlenbegen
ASTANA. KAZINFORM – Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov jol qurylysy kezindegi jemqorlyq táýekelderdi atady.
«Agenttik avtojol salasyndaǵy jemqorlyq táýekelderine syrtqy taldaýdy aıaqtady. Máselen, sońǵy 5 jylda jol salasyna 6 trln teńgeden astam qarajat jumsaldy. Biraq jol jelisiniń jaı-kúıi halyq tarapynan shaǵym týdyrýda. 2023-2024 jyldary memlekettik organdarǵa avtomobıl joldarynyń sapasyzdyǵyna qatysty 20 myńnan astam shaǵym tústi. Syrtqy taldaý josparlaýdan bastap baqylaý men kútip ustaýǵa deıingi jol qurylysy men jóndeýdiń barlyq kezeńderinde júıeli jemqorlyq táýekelderiniń bar ekendigin kórsetti», - dedi resmı ókil.
Onyń atap ótýinshe, bastapqy kezeńde problemalyq ýchaskeler durys anyqtalmaı, jóndelgenine kóp ýaqyt bolmaǵan joldar jóndeledi. Jobalaý kezinde smeta shamadan tys jumys pen materıaldardyń esebinen jasandy túrde joǵarylatylady. Kelisimsharttar kóbinese tájirıbesi men resýrstary joq merdigerlermen, bir kózden nemese karteldik kelisim sharttarymen jasalady. Qosalqy merdigerlik uıymdardy tartý eshkimniń baqylaýynda emes.
«Jol aktıvteriniń ulttyq sapa ortalyǵynyń anyqtalǵan aqaýlar týraly qorytyndylaryn oryndaý mindetti emes, al tehnıkalyq qadaǵalaý óz fýnktsııalaryn resmı túrde oryndaıdy. Jańa tehnologııalardy engizýdi baqylaýdyń bolmaýy, bilikti kadrlardyń jetispeýshiligi jáne kúrdeli normatıvtik-quqyqtyq baza da avtojoldardyń sapasyna áser etedi. Tsıfrlandyrýdyń jetkiliksizdigi problemany ýshyqtyrady. Sońǵy 10 jylda Aqparattyq júıelerdi damytýǵa 16 mlrd bıýdjet qarajaty jumsaldy. Degenmen, joldardyń tsıfrlyq kartasy áli ázirlenbegen», - dedi Danııar Begaıdarov.
Buǵan deıin habarlanǵandaı, bıyl avtomobıl joly salasynda 24 qylmystyq is tirkelgen.
