10 jylda 11,5 mln adamǵa qoldaý: Bolat Jámishev «Samruk-Kazyna Trust» qorynyń esebine kúmán keltirdi
ASTANA. KAZINFORM – «Samuryq-Qazyna» qorynyń qoǵamdyq keńesinde «Samruk-Kazyna Trust» qorynyń jumysy talqylanyp jatyr.
Qordyń bas dırektory Alfııa Adıeva jyl saıyn orta eseppen 30-50 áleýmettik joba iske qosylyp, 1 mıllıon 150 myń adamdy qamtyp otyrǵanyn aıtqan.
«Samuryq-Qazyna» qorynyń qoǵamdyq keńes múshesi Oljas Baıdildınov áleýmettik jobalardyń aýqymyn bulaı esepteýdiń shynaıylyǵyna kúmán keltirdi.
- Tanystyrylymda áleýmettik jobalar arqyly 11,5 mln adam (10 jylda) qamtylǵan dep tur. Osy san nazarymdy aýdarǵan soń, saıttaryńyzǵa kirip, qalaı esepteıtinderińizdi shamalap túsindim. Mysaly, Jańaózende kitaphana ashylypty. Osy kitaphana arqyly 15 myńnan astam adamdy qamtıtyndaryńyzdy jazyp qoıypsyzdar. Ulttyq statıstıka bıýrosynyń málimeti boıynsha, Jańaózende 152-158 myń adam turady eken. Onyń keminde 60 myńy bala desek, onyń úshten bir bóligi árip tanymaıdy, kitaphanaǵa bara almaıdy degen sóz. Osydan-aq 11,5 mln adam degen san qoldan ósirilgen. Sizderdiń esepterińizge sensek, árbir ekinshi qazaqstandyq «Samruk-Kazyna Trust» qorynyń ıgiligin kórgen bolyp shyǵady. 11,5 mln qazaqstandyqtyń árbirine 10 myń teńgeden jumsalǵan bolyp tur. Bul durys emes, qaıta esepteý kerek dep oılaımyn, - dedi sarapshy.
Bul eskertýdi qoǵamdyq keńes tóraǵasy Bolat Jámishev te qoldady.
- Keńeske ádemilep esep berýdi kózdegenderińiz kórinip tur. Biraq eń ádemi esep – aıqyn ári naqty esep. Sizderdiń esepterińizdiń naqtylyǵyna eskertý bar. Jańaǵy aıtqan 11,5 mln adam soǵan mysal bola alady. Esepteý ádistemelerińiz túsiniksiz. Osy tásilmen esepteı berseńizder, endi bir 20 jyldan keıin áleýmettik jobalarmen qamtyǵan adamdaryńyzdyń sany Qazaqstan halqynyń sanynan asyp túsetin túri bar. Qorlaryńyzdyń jumysy ásirelep kórsetýge muqtaj emes. Іstep jatqan jumystaryńyzdyń naqty esebin berseńizder jetip jatyr. Sandardy «qulaǵynan tartyp kórsetýdiń» esh qajeti joq, - dedi Bolat Jámishev.
Sondaı-aq, Alfııa Adıeva 10 jyldyń ishinde «Samruk-Kazyna Trust» qarjysyna 274 áleýmettik nysan iske qosylǵanyn aıtty.
- Olardyń qatarynda 19 sport kesheni men 160-tan asa oıyn alańy, 55 ońaltý ortalyǵy, ınklıýzııany qoldaý kabınetteri, mýzeıler men kitaphanalar, belsendi uzaq ómir súrý ortalyqtary men kreatıvti habtar bar. Bul jobalar jańa jumys oryndarynyń ashylýyna jáne óńirlik áleýmettik ınfraqurylymnyń damýyna serpin berdi, - dedi ol.
Al adam kapıtalyn damytýǵa baǵyttalǵan 434 joba qolǵa alynǵan.
- Qor 2020 jyldan bastap óńirlerde ońaltý ortalyqtaryn asha bastady. 5 jastan 18 jasqa deıingi balalarǵa arnalǵan alǵashqy «Qamqorlyq» ortalyqtary Qostanaı, Atyraý, Batys Qazaqstan óńirlerinde iske qosyldy. Búginde olardyń sany 18-ge jetti. 3 aıdan 3 jasqa deıingi balalarǵa arnalǵan 21 erte aralasý ortalyǵy ashyldy.
Qor 2023 jyly aýtızmi bar balalarǵa arnalǵan alǵashqy ortalyqtardy ashyp, jobaǵa «Qazaqstan halqyna» qoryn seriktes retinde tartty.
Inklıýzııa baǵyty boıynsha sońǵy tórt jyldaǵy júıeli jumystyń nátıjesinde jyl saıyn 21 800 balany ońaltýmen qamtyp, 4 200 balanyń áleýmettenýine jáne 2 000 balanyń ınklıýzıvti bilim alýyna jol ashyp otyr, - dedi qordyń bas dırektory.
Aıta keteıik, «Samuryq-Qazynaǵa» qańtardyń sońyna deıin úsh qalada JEO salý máselesin sheshý mindetteldi.
