10 jyl ótilmen 265 myń teńge: Órt sóndirýshilerdiń aılyǵy qalaı ósti
ASTANA. KAZINFORM – «Tótenshe jaǵdaılar mınıstrligi órt sóndirýshilerdiń aılyǵy qanshalyqty óskeni týraly málimet usyndy.
Máseleniń máni
«Qazgıdromettiń» boljamyna súıensek, bıylǵy jaz jyldaǵydan erekshe qurǵaq bolatyn túri bar. Bul órt sóndirýshilerdiń jumysyn qıyndatady. Al olardyń aılyǵyn kóterý úderisi qalaı júrip jatyr? Tótenshe jaǵdaılar mınıstrliginen sala mamandarynyń eńbekaqysy týraly suraǵanbyz.
- 2024-2025 jyldary órt sóndirýshilerdiń jalaqysy ósken joq. Sonymen birge órt sóndirýshilerdiń jalaqysy 2023 jylǵy 1 qańtardan bastap kóterildi, - dep jazady mınıstrliktegiler.
Atap aıtqanda, bylaı dep naqtylaıdy:
1) órt sóndirýshilerdiń laýazymdyq jalaqysyn kóterý 50%-dan 60%-ǵa deıin júrgizildi
2) tótenshe jaǵdaılarǵa jedel den qoıýǵa turaqty daıyndyǵy úshin órt sóndirý bólimderiniń qyzmetkerlerine laýazymdyq jalaqysynyń 10% mólsherinde ústemeaqy tólenedi.
Mınıstrlik málimetinde órt sóndirýshilerdiń ortasha aılyq mólsheri naqty kórsetilmegen.
- Órt sóndirýshilerdiń jalaqysy eńbek ótiline, synyptylyǵyna, ataǵyna baılanysty esepteledi. Eńbek ótili 6 jyl bolǵan kezde - 255 651 teńge, eńbek ótili 10 jyl bolǵanda - 264 853 teńge, - dep jazylǵan resmı málimette.
«Taralýy shekteýli aqparat»
Qyzmetkerlerdiń aılyǵy qanshalyqty ádiletti taǵaıyndalǵanyn túsiný úshin salaǵa jaýapty birinshi basshy men qyzmettik satynyń eń tómengi baspaldaǵynda turǵan qatardaǵy órt sóndirýshiniń aılyǵynyń arasynda qanshalyqty aıyrmashylyq bar ekenin suraǵanbyz. Alaıda mundaı aqparat «qyzmet babynda paıdalanylady» deıtin grıfpen qupııa bolyp shyqty.
- Memlekettik bıýdjet esebinen qarjylandyrylatyn barlyq organnyń qyzmetkerlerine, onyń ishinde áskerı qyzmetshilerge, azamattyq qorǵaý organdary qyzmetkerlerine eńbekaqy tóleýdiń biryńǵaı júıesi QR Úkimetiniń 2017 jylǵy 16 qazandaǵy № 646 dsp qaýlysymen bekitilgen. Onda aqshalaı úles (laýazymdyq aılyqaqy, ataq úshin qosymsha aqy, erekshe jaǵdaılar úshin ústemeaqy) kózdelgen.
Osyǵan baılanysty, 2019 jylǵy 1 qańtardaǵy jáne 2024 jylǵy 1 qańtardaǵy jaǵdaı boıynsha qoldanystaǵy tizim boıynsha jalaqy týraly málimetterdi usyný múmkin emes. Óıtkeni joǵaryda atalǵan qaýlynyń taralýy shekteýli qoljetimdilik sıpaty bar («QBP» grıfi), - delingen TJM jaýabynda.
Buǵan deıin Ekologııa jáne tabıǵı resýrstar mınıstri Erlan Nysanbaev Úkimet otyrysynda orman órtin sóndirý stantsııalaryn jańartýǵa aqsha bólmeı otyrǵan oblystardy ataǵan edi.