10 jyl kútken altyn medal – Astanalyqtar Mıhaıl Shaıdorovty kútip aldy
ASTANA. KAZINFORM – Mánerlep syrǵanaýdan Seýlde ótken tórt qurlyq chempıonatynyń jeńimpazy Mıhaıl Shaıdorov elge oraldy. Sportshyny Astana áýejaıynda jankúıerleri sán-saltanatpen kútip aldy.
Otandasymyz qossaıysta 285.10 upaı jınap, AQSh, Japonııa, Ońtústik Koreıa sportshylaryn aıqyn basymdyqpen jeńdi.
Al jaqynda Harbınde ótken qysqy Azııa oıyndarynda Mıhaıl Shaıdorov qola júlde jeńip alǵan edi.
− Bul jarys óte aýyr ótti. Óıtkeni tórt qurlyq chempıonaty birden Azııa oıyndarynan keıin ótti. Shyn máninde túrli kúıdi bastan ótkerdim, birinshiden, qysqa baǵdarlamadan keıin kóshbasshy bop shyǵatynyma senbedim, erkin baǵdarlamaǵa shyǵý óte qıyn boldy. Jalpy sporttyq mansabymda alǵash ret meniń mýzykam emes, basqa áýen qosylyp ketti. Biraq bul meni múlde shatastyrmady, barynsha taza syrǵanadym. Bul men úshin naǵyz ǵajaıyp sát boldy, óıtkeni osydan 10 jyl buryn dál osy arenada Denıs Ten dál osyndaı upaımen birinshi oryn ıelengen edi, − dedi M. Shaıdorov agenttik tilshisine bergen suhbatynda.
Sportshy jeńiske jetemin dep oılamaǵanyn, biraq júldeli oryndardyń birine úmittengenin jasyrmady.
− Qysqa baǵdarlamada da, erkin baǵdarlamada da úzdik shyǵyp, tórt qurlyq chempıonatynyń jeńimpazy bolamyn dep oılamadym. Áli kúnge deıin tolyq sezine almaı júrmin. Uıymdastyrýshylar meniń mýzykamdy qate qosqany úshin keshirim surady. Úsh kún boıy qaıta-qaıta keshirim surap júrdi. Biraq bul qatelik meni múlde oıymnan jańyldyrmady, kerisinshe, maǵan kómektesken de shyǵar. Qazir azdap demalǵym keledi, sebebi jarystar men starttar birinen soń biri ótti. Eń bastysy — qalpyma kelý, sodan keıin Álem chempıonatyna budan da myqty daıyndyqpen barý, − deıdi tórt qurlyq chempıony.
Sonymen birge, M. Shaıdorov Denıs Tenmen kezdesken sátterin esine aldy.
− Almatyda Denıs ótkizgen sheberlik sabaqtaryna birneshe ret qatysý múmkindigi týdy. Tipti bir ret «Halyq Arena» kireberisinde Denısti tanyp, qol sozyp amandastym. Ol meni tanymasa da, jyly shyraı tanytyp, amandasty. Osy sáttiń ózi men úshin sózben aıtyp jetkize almaıtyn ǵajap sezim boldy, qaharmanyńmen qol alysýdyń ózi — umytylmaıtyn sát, − dep eske aldy M. Shaıdorov.
Aıta keteıik, osydan 10 jyl buryn marqum Denıs Ten de Seýl tórinde chempıon atanǵan edi. Mıhaıl Shaıdorov ta Denıs Ten memorıalynda altyn medal alǵan bolatyn.
Buǵan deıin Astana jurty áýejaıdan qysqy Azııa oıyndarynda el qorjynyna bir altyn, bir kúmis medal salǵan bıatlonshy Vladıslav Kıreevti qarsy alǵan edi.