Eldegi 10 JEO «qyzyl aımaqta» qalyp otyr
ASTANA. KAZINFORM – Energetıka mınıstri Erlan Aqkenjenov aldaǵy jylytý maýsymyna asa mańyzdy jylý elektr ortalyqtaryn daıyndaý máseleleri boıynsha arnaıy keńes ótkizdi.
Keńeske oblys ákimderiniń orynbasarlary, energetıkalyq kásiporyndardyń basshylary jáne óńirlik shtabtardyń ókilderi qatysty.
Keńesti asha otyryp, mınıstr aǵymdaǵy jylytý maýsymy shtattyq rejımde ótip jatqanyn atap ótti. «Investıtsııaǵa aıyrbastalǵan tarıf» baǵdarlamasynyń arqasynda 2025 jyly eldegi JEO-lardyń jalpy tozý deńgeıi 61%-dan 59%-ǵa deıin tómendedi.
Úsh JEO «jasyl aımaqqa» aýystyrylyp, toǵyz nysan «qyzyl aımaqtan» shyǵaryldy.
Sonymen qatar jaǵdaı qosymsha qatań sharalardy talap etedi: búgingi tańda Qazaqstandaǵy 37 JEO-nyń 10-y «jasyl aımaqta», 17-si «sary aımaqta», al 10 stantsııa áli de «qyzyl aımaqta» qalyp otyr.
Jedel nazar aýdarýdy qajet etetin problemalyq nysandar qataryna Semeı, Temirtaý (GRES-1), Petropavl, Aqtaý (JEO-2), Pavlodar (JEO-2), Stepnogorsk, Oral, Qyzylorda, Arqalyq jáne Taraz qalalaryndaǵy JEO-lar engizildi.
Atalǵan stantsııalarda jaǵdaıdy turaqtandyrý úshin aýqymdy jóndeý naýqandary bekitildi. Jalpy problemalyq nysandar boıynsha 9 energoblokty, 55 qazandyqty jáne 51 týrbınany kúrdeli jóndeý josparlanǵan. Qazirgi tańda 2 energoblok, 5 qazandyq jáne 2 týrbına jóndeýden ótkizilýde. 1 týrbınanyń jóndeýi aıaqtaldy.
— Atap aıtqanda, «qyzyl aımaqtaǵy» JEO-larda jabdyqtardy jańǵyrtý jumystary júrgizilip jatyr. Stepnogorsk JEO-synda 2 qazandyq agregaty men 2 týrboagregatty jańartý josparlanǵan. Petropavl JEO-2-de 5 qazandyq pen 1 týrboagregat jóndeledi. Pavlodar JEO-2-de 2 qazandyq pen 2 týrboagregat jóndeý kózdelgen. Aqtaýdaǵy MAEK JEO-2-de 2 qazandyq pen 2 týrboagregat jóndeledi. Taraz qalasyndaǵy JEO-4-te 1 qazandyq agregaty jańartylady, al Temirtaýdaǵy GRES-1-de 1 qazandyq pen 1 týrboagregat daıyndalady, — delingen habarlamada.
Sonymen qatar júrgizilgen taldaý tek jóndeý jumystarymen shektelý jetkiliksiz ekenin kórsetti. Erlan Aqkenjenov kommýnaldyq nysandardy qarjylandyrýdyń shekteýli ekenin jáne jabdyqtardy jańartqannan keıin de apattyq táýekelderdiń saqtalatynyn atap ótti. Bul qysqa merzimdi josparlaýdan júıeli jumysqa kóshý jáne merdigerlerge baqylaýdy kúsheıtýdi talap etedi.
— Kelesi jylytý maýsymyna osyndaı máselelermen kirýge bolmaıdy. Osy on stantsııany «qyzyl aımaqtan» shyǵarý — aǵymdaǵy jóndeý naýqanynyń absolıýtti basymdyǵy. Ákimdikter men stantsııa ıelerinen formaldy esep emes, naqty, kezeń-kezeńimen júzege asyrylatyn tehnıkalyq saýyqtyrý josparlaryn talap etemin. Barlyq táýekelder jedel túrde jáne jergilikti deńgeıde sheshilýi tıis, — dedi mınıstr.
Keńes qorytyndysy boıynsha birqatar naqty tapsyrma berildi:
Óńir ákimdikterine — aǵymdaǵy aıdyń sońyna deıin JEO-lardy «qyzyl aımaqtan» shyǵarý boıynsha naqty tehnıkalyq sharalardy qamtıtyn egjeı-tegjeıli josparlardy bekitý;
«KEGOC» AQ-qa — jóndeý jumystarynyń kesteleriniń oryndalýyna qatań júıeli monıtorıng júrgizý;
Memlekettik energetıkalyq qadaǵalaý komıtetine — on problemalyq JEO-daǵy jumystarǵa jáne merdiger uıymdardyń qyzmetine apta saıyn baqylaý ornatý.
Erlan Aqkenjenov barlyq anyqtalǵan táýekelderdi jedel sheshý qajettigin atap ótip, óńirler júıeli tásil men belsendilik tanytýy tıis ekenin jetkizdi. Bul halyqty senimdi jylýmen qamtamasyz etýge jáne eldiń energetıkalyq ınfraqurylymynyń turaqty jumysyn qamtamasyz etýge múmkindik beredi.
Halyqty senimdi jylýmen qamtamasyz etý máselesi Energetıka mınıstrligi basshylyǵynyń erekshe jeke baqylaýynda.
Aıta ketelik aýany shekten tys lastaǵan ekibastuzdyq JEO qomaqty aıyppul arqalady.