10 jasar qyzynyń basyn kólikke urǵan astanalyq áıeldiń ústinen is qozǵaldy
ASTANA. QazAqparat – Áleýmettik jelide áıeldiń jasóspirim qyzdy súırep kólikke mingizbek bolǵan sáti túsirilgen vıdeo tarady. Beınejazbadan baıqalǵandaı, qyz bala jalań aıaq jáne ol jylap tur. Bolǵan jaıtqa qatysty Astana qalasynyń polıtsııa departamentiniń baspasóz qyzmeti túsinik berdi, dep habarlaıdy QazAqparat tilshisi.
«Áleýmettik jelige monıtorıng júrgizý barysynda áıeldiń qyzdy kólikke súırep aparyp, ony kólikke ıterip urǵany týraly beınejazba anyqtaldy. Іzdeý nátıjesinde «Almaty» aýdany polıtsııa bóliminiń qyzmetkerleri vıdeodaǵy keıipkerlerdi tapty. Ol 52 jastaǵy elorda turǵyny men onyń 10 jasar qyzy bolyp shyqty», - delingen resmı habarlamada.
Sondaı-aq, polıtsııa departamentiniń baspasóz qyzmeti vıdeodaǵy jaıtqa qatysty ákimshilik is qozǵalǵany týraly habarlady.
«Qazir ıývenaldy polıtsııa qyzmetkerleri atalǵan áıelge qatysty QR Ákimshilik quqyqbuzýshylyq týraly kodeksiniń 127-babyna saı is qozǵady. Túpki sheshimdi Astana qalasynyń kámeletke tolmaǵandar jónindegi mamandandyrylǵan aýdanaralyq soty qabyldaıdy», - deıdi vedomstvodan.
Aıta ketsek, atalǵan vıdeo jelide keńinen taralyp, talqyǵa túsip jatyr.
