10 jasar qyzdyń zorlanýy: Irlandııada narazylyq aktsııalary áli jalǵasyp jatyr

ASTANA. KAZINFORM — Irlandııa astanasy Dýblınde antımıgranttyq sıpattaǵy tártipsizdikter basylar emes. Sonyń saldarynan 20-dan astam adam ustaldy, dep habarlaıdy VVS.

Sársenbi keshinde bosqyn mártebesin izdep júrgender turyp jatqan qonaqúıdiń mańyna narazylyq bildirýshiler — negizinen jasóspirimder men jastar jınalǵan.

Olar polıtseılerge bótelke men feıerverk laqtyrǵan, keıin jol men tramvaı aıaldamasyndaǵy tas tósenishterdi buzyp alyp, sonymen shabýyl jasaǵan.

Polıtsııa narazylyq bildirýshilerdiń kóptep jınalýyna jol bermeýge tyrysqan. Saldarynan eki qyzmetker jaraqat aldy.

Quqyq qorǵaý organdary sý atqysh kólik daıyndaǵanymen, onyń keregi bolmady.

Barlyǵy 23 adam ustaldy. Aldaǵy kúnderi olarǵa qoǵamdyq tártipti buzý boıynsha aıyp taǵylmaq.

Buǵan deıin, seısenbi kúni sol qonaqúıdiń janynda 2 myńǵa jýyq adam beıbit túrde narazylyqqa shyqqan edi. Alaıda kóp uzamaı betperde kıgen adamdar bótelke men tas laqtyra bastap, polıtsııa kóligin órtep jibergen.

Oqıǵa kezinde alty adam ustalyp, bir áıel polıtsııa qyzmetkeri aıaǵynan jaraqat aldy.

Narazylyqqa ne túrtki boldy

Tártipsizdikterge 10 jastaǵy qyz balaǵa seksýaldyq sıpattaǵy zorlyq jasaldy degen habar sebep bolǵan. Oqıǵa bosqyndar turyp jatqan qonaqúı mańynda bolǵan kórinedi. Polıtsııa kúdiktini ustaǵan.

26 jastaǵy er adamǵa aıyp taǵyldy. Ol týraly kóp málimet joq: sotta tek onyń jumys istemeıtini jáne advokaty arab tilinen aýdarmashy suraǵany aıtyldy.

Irlandııa polıtsııasy – Garda komıssary Djastın Kellı tártipsizdikterdi «múldem qabyldaýǵa bolmaıtyn áreket» dep atady. Quqyq qorǵaýshylardyń boljamynsha, narazylyqtar aldyn ala onlaın túrde uıymdastyrylǵan.

Aıta keteıik, 2025 jyldyń maýsymynda Soltústik Irlandııada da osyndaı oqıǵa bolǵan. Ol kezde Ballımına qalasynda jasóspirim qyzǵa jasalǵan zorlyqqa baılanysty beıbit sherý birneshe kúnge sozylǵan tártipsizdikke ulasqan.

Buǵan deıin Italııada 2 mıllıonnan astam adamnyń qatysýymen jappaı ereýilder ótken edi.