10 ushaq pen 133 lokomotıv, 2 munaı tankeri satyp alyndy: Kólik mınıstrligi jyldy qorytyndylady
Jyl qorytyndysy boıynsha kólik salasynyń barlyq negizgi ındıkatorlary jaqsy kórsetkishterge jetip, ósim 7 paıyzdy qurady. Investıtsııalar kólemi 1,6 ese ósip, 1,8 trln teńgege jetti.
Bul týraly Kazinform QR Kólik mınıstrliginiń baspasóz qyzmetine silteme jasap habarlaıdy.
Mınıstrlik tarapynan mańyzdy suraqtar boıynsha naqty sharalar qabyldandy. Atap aıtqanda:
- uzaqqa sozylǵan jol jobalaryn jedeldetý;
- Transkaspıı halyqaralyq kólik marshrýtyn damytý;
- teńiz porttarynyń ınfraqurylymyn nyǵaıtý;
- tranzıttik temir jol júk tasymaldaryn ulǵaıtý;
- Qazaqstan-Qytaı shekarasyndaǵy shekaralyq ótkelderdiń ótkizý qabiletin arttyrý;
- áýe saparlaryna degen ósip kele jatqan suranysty qanaǵattandyrý.
Nátıjesinde «Taldyqorǵan-Óskemen», «Astana-Almaty» avtojoldarymen jol júrý qamtamasyz etildi, «Qandyaǵash-Maqat» ýchaskesiniń qurylysy aıaqtaldy, «Úsharal-Dostyq» tas joly tolyǵymen salyndy. Sonymen qatar bıyl BAKAD paıdalanýǵa berildi.
Temirjol salasynda 133 jańa lokomotıv pen 275 jartylaı vagon satyp alyndy. Dostyq – Moıynty ýchaskesinde ekinshi joldardyń qurylysy júrgizilip, Qytaıdyń Sıan qalasynda jeke termınal ashyldy.
Jyl ishinde 10 jańa ushaq satyp alynyp, 23 baǵyt boıynsha 13 elge jańa reıster jańartyldy jáne ashyldy. Іshki tasymaldaý kólemi qalpyna keltirilip, tasymaldaýshylardyń jumysy jáne jolaýshylardyń quqyqtaryn qorǵaý tetikteri jaqsartyldy.
Bıyl Transkaspıı halyqaralyq kólik marshrýty boıynsha 2 mln 750 myń tonna júk tasymaldandy, bul 2022 jylmen salystyrǵanda 64%-ǵa artyq.
«Marshrýttyń áleýetin damytý úshin Potı portynda termınal qurylysy bastalyp, 2 munaı tankeri satyp alyndy. Sonymen birge Quryq portynda Abu Dhabi porttarymen birlesip astyq termınaly iske qosyldy, taza sýtegi men ammıakty Eýropaǵa tasymaldaý jóninde kelisimge qol qoıyldy»,-delingen habarlamada.
