10 ulttyq jobanyń is-sharalaryn ıntegratsııalaý boıynsha jumys aıaqtalyp qaldy

ASTANA. QazAqparat – Úkimet ulttyq jobalardyń jańartylǵan tizbesin ázirledi. Bul týraly Májilistiń jalpy otyrysynda Úkimettiń 2022 jylǵy respýblıkalyq bıýdjettiń atqarylýy týraly esebin qaraý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memlekettik josparlaý júıesin reformalaý aıasynda memlekettik baǵdarlamalardyń ornyna 10 ulttyq joba iske asyrylyp jatyr. Sonymen birge, reformalar jónindegi joǵary keńestiń tapsyrmasy boıynsha Úkimet ulttyq jobalardyń jańartylǵan tizbesin ázirledi. Osyǵan baılanysty jańa formattaǵy «Jaıly mektep» jáne «Aýyldyq densaýlyq saqtaýdy jańǵyrtý» ulttyq jobalary bekitildi. Sondaı-aq, «Qoljetimdi ınternet» jobasy ázirlendi. Osylaısha, kólemdi qujattardyń ornyna naqty problemalardy sheshýge baǵyttalǵan qysqa əri nusqa ulttyq jobalardyń formatyna kóshý júzege asyrylyp otyr», - dedi E. Jamaýbaev.

Onyń aıtýynsha, qazirgi kezde qoldanystaǵy 10 ulttyq jobanyń is-sharalaryn Memlekettik josparlaý júıesine jáne ózge de qujattarǵa ıntegratsııalaý boıynsha jumys aıaqtalyp qaldy.

«Naqty salalardy damytýǵa baǵyttalǵan 2029 jylǵa deıingi 15 tujyrymdama bekitildi. Olar Prezıdenttiń saılaýaldy baǵdarlamasyn iske asyrý josparymen úılestirilgen», - dedi Qarjy mınıstri.

Budan buryn habarlanǵandaı, búgin Májilistiń jalpy otyrysynda byltyr Qytaıdan kelgen taýarlar boıynsha bıýdjetke 465 mlrd teńgege kedendik tólem men salyq túskeni aıtyldy. Bul 2021 jylmen salystyrǵanda 60% artyq.