10 tildi meńgergen túrkistandyq azamat «Jan shýaq» syılyǵynyń ıegeri atandy

Astanada «AMANAT» partııasynyń qoldaýymen Qazaqstan múgedekter konfederatsııasy uıymdastyrǵan XVI «Jan Shýaq» qoǵamdyq syılyǵynyń laýreattaryn marapattaý rásimi ótti. Marapattalǵan azamattardyń qatarynda Túrkistan oblysy Túlkibas aýdanyndaǵy Tastumsyq aýylynyń turǵyny Meıirhan Topanbaı da bar, dep habarlaıdy Kazinform.

Túlkibas aýdanyna qarasty Tastumsyq aýylynyń turǵyny Meıirhan Topanbaı zamandastarynyń ortasynda polıglot atanyp ketken. Ol túrik, parsy, nemis, grek, ıspan, armıan, polıak, tájik, frantsýz tilderin jetik biledi. Al, aǵylshyn tilin turmystyq deńgeıde meńgergen. «Orys tili men ádebıeti pániniń muǵalimi» mamandyǵy boıynsha joǵary bilimdi polıglot qazir ıtalıan tilin úırenip júr. Sondaı-aq shet tildegi ádebıetterdi qazaqshaǵa aýdaryp, jınaqtar qurastyrýmen aınalysady.

«Til úırený – men úshin jan rahaty. Til úırený arqyly kóńilim tynyshtalady. Anam bul qasıet naǵashylarymnan berilgen deıdi. Jazýshy, qoǵam qaıratkeri, ǵalym Myrzakeldi Kemel – naǵashy atam. Sol kisi baǵyt-baǵdar berip, bilgenin úıretti. Árqashan aqylyn aıtyp otyratyn», - deıdi ol. 

Meıirhan Meırambekuly týǵannan sal aýrýyna shaldyqqan. Bir kózi múldem kórmeıdi. Taıaqtyń kómegimen júredi. Densaýlyǵyna árdaıym kútim kerek. Degenmen, jigerli jannyń ómirge degen qulshynysy joǵary. Árdaıym izdenip, ózin jetildirip otyrady. Eń bastysy, «Múgedek bolsam da, masyl bolǵym kelmeıdi» degen qaǵıdany ustanady.

«29 jyl boıy osy dertpen kúresip kelemin. Basyma ne kelip, ne ketpedi? Bárin synaq retinde qabyldap, qıyndyqqa esh moıymadym. Jalpy, men úıdiń úlkenimin. Menen keıin qaryndasym bar. Ákem Meırambek traktor aıdaǵan qarapaıym eńbek adamy boldy. Anam Ulbosyn shet tili pániniń muǵalimi edi. Meni bosanǵan soń jumys isteýge múmkindigi bolmady. Emdetip júrip, amandyǵymdy tilep, qatarǵa qosty. Osyndaı myqty bolýyma naǵashy ájem Jumash ta sebepker boldy. «Quqyńdy qorǵaýǵa kerek bolady» dep 5 jasymnan bastap zańdy jattatty. «Alla synaqty súıgen qulyna ǵana beredi» dep, jigerlendirip otyrdy. Ómirge beıimdedi. Zeınetaqysyna braıl alfavıtin alyp berip, jazýdy, oqýdy meńgertti. Oqýǵa degen mahabbatym ájemnen daryǵan. 1 000-ǵa jýyq kitap jıyp, maǵan úlken azyq qaldyrdy», - deıdi ol.

Meıirhan oqýdy bitirgen soń, alǵashqy eńbek jolyn Jaskeshý aýdandyq mádenıet úıinen bastady. Uıymdastyrýshynyń kómekshisi retinde «Úmit kerýeni» atty festıval men «Ózińdi súı» atty motvatsııalyq kesh ótkizdi. Erekshe jannyń qolǵa alýymen iske asqan jobalar búgingi kúnge deıin jylda jalǵasyn taýyp keledi. 

«Ózim sekildi naýqas balalarǵa kómek kórsetýdi maqsat etip, «Defektolog» mamandyǵyn meńgerdim. Keıin ekinshi ret oqýǵa túsip, «orys tili men ádebıeti» pániniń muǵalimi dıplomyn aldym. Ekeýinde de memlekettik grantpen bilim aldym. Myrzageldi Kemel men Ábdimusa Qýatbekov esimdi jany jomart jandar kóp qoldaý kórsetti. Al, meniń mamandyq alýyma ustazdarym Rabıǵa Qýatbekova men Janna Botabaeva úlken eńbek sińirdi. Barshasyna rızashylyǵym sheksiz», - deıdi erekshi jan.

Búginde Meıirhan Topanbaı Tastumsuq aýylyndaǵy kitaphanada qyzmet etedi. Tańerteńmen kelip, kitaptardy túgendep, oqyrmandarmen baılanys ornatady. Túrli mádenı is-sharalar uıymdastyrady. Kitaphanashy jigittiń bul talpynysyn kórgen jerlesteri de qoldaý kórsetip, jiger berip júredi. Meıirhannyń ózi de kitapty kóp oqıdy. Búgingi kúnge deıin 68 myń kitapty oqyp taýysypty.

«Kitaphanada 14 000-nan astam kitap bar. Olardyń ishinde tek jańadan kelgenderin ǵana áli oqyp úlgermedim. Sondaı-aq bos kezimde toqymany ermek etemin. Sebebi, ol bizdiń densaýlyǵymyzǵa óte paıdaly. Al, toqyǵan sómke, shulyq sekildi zattarymdy tanystaryma syılap jiberemin», - deıdi ol.

Búginde Meıirhannyń «Aqıqattan attamaıyq!» atty alǵashqy aýdarmalar jınaǵy jaryq kórgen. Qazir «Janymnyń jaquty» atty ekinshi jınaqty baspaǵa daıyndap jatyr. Bul iske jýrnalıst Beısenkúl Narymbetova uıytqy bolypty. 

Keıingi kezde polıglot jigit ertegiler jazýǵa bet burdy. «Sardar súıgen sulýlar», «Gúlge yntyq Gúlbahar» atty týyndylaryn oqyǵan kópshilik joǵary baǵasyn bergen. Qazirgi tańda túrik jazýshysy Gúnaı Tekınniń «Júregimdegi qala» kitabyn aýdaryp jatyr.

Meıirhan Topanbaı «AMANAT» partııasynyń qoldaýymen Qazaqstan múgedekter konfederatsııasy uıymdastyrǵan XVI «Jan Shýaq» qoǵamdyq syılyǵynyń laýreaty atandy. Jeńimpaz 1 mln. teńge kólemindegi aqshalaı syılyqqa ıe boldy. 

Aıta keteıik, buǵan deıin 10 tildi erkin meńgergen túrkistandyq azamattyń 68 myń kitap oqyǵanyn jazǵan bolatynbyz.