10 synyp oqýshysy eki kózi kórmeıtin anasyn asyrap otyr
Ortalyq mamandary bul otbasyny kópshiliktiń kórsetýimen tapqan. Jalǵyzbasty, ózi múgedek ana 15 jastaǵy ulymen qalanyń shetinde 15 myń teńgege páter jaldap turady eken.
«Buryn bul áıel tigin tikken. Qazir eki kóziniń kórmeı qalýyna baılanysty jumys joq, úıde otyr. 15 jastaǵy balasy 10 synypta oqıdy. Ol oqýdan bos kezinde kólik jýyp aqsha tabady eken. Úıiniń nan-sýyn sol bala ajyratyp otyr. Balasy keremet tárbıe alǵan. Anasyn kıindiredi, jýyndyrady, tamaqtandyrady. Ol kisilerdiń jaǵdaıyn túsiný úshin kórý kerek. Bul otbasy sońǵy jyldary múlde et jemegen. Osyndaı naǵyz muqtaj adam AÁK qaǵylyp qalǵan. Ákimdikke baryp qujattaryn rettep, aıyna 42 280 teńge ataýly kómek, bir rettik 53 myń teńge kóleminde áleýmettik kómek taǵaıyndadyq. Bul qarajat olar úshin baılyq dese de bolady», - dedi ortalyqtyń úılestirýshisi Naǵıgúl Beısembına.
Endi «Baqytty otbasy» ortalyǵy múgedek áıeldiń kózine em jasatpaq.
«Bizdiń bir ereksheligimiz - memlekettik qyzmetkerlerden góri ár adamnyń taǵdyryn jekelep qaraýǵa tyrysamyz. Bul áıel munyń aldynda da barǵan ákimdikke. Biraq oǵan kómek kórsetilmegen. Sebebi turyp jatqan saıajaıyna sol turǵyn úı ıesiniń tabysy qosa eseptelip ketken. Sol sebepti ol kisi AÁK ala almaǵan. Endi bul kisige biz aıyna bir ret azyq-túlik sebetimen kómektesetin bolamyz», - dedi ortalyqtyń jetekshisi Sana Jandaı.
