10 shildeden bastap eldegi tórt aqyly avtojolda ortasha jyldamdyq baqylanady
ASTANA. KAZINFORM — QazAvtoJol ulttyq kompanııasy AQ 10 shildeden bastap respýblıkalyq mańyzy bar avtomobıl joldarynyń jekelegen aqyly ýchaskelerinde kólik quraldarynyń ortasha jyldamdyǵyn baqylaýdy engizedi.
Kompanııanyń málimetinshe, bul shara jol-kólik oqıǵalaryn azaıtýǵa, jyldamdyq rejımin buzýdyń aldyn alýǵa jáne júrgizýshiler men jolaýshylardyń qaýipsizdigin arttyrýǵa baǵyttalǵan.
Ortasha jyldamdyqty baqylaý eki baǵytta kelesi ýchaskelerde qoldanylady:
- Aqtóbe — Qandyaǵash;
- Almaty — Qorǵas;
- Kókshetaý — Petropavl;
- Astana — Temirtaý, Arshaly — Oshaǵandy ýchaskesi.
— Júıeni engizýdegi basty maqsat — jazalaý emes, joldaǵy qaýipti áreketterdiń aldyn alý. Tájirıbe kórsetkendeı, jyldamdyqty shamadan tys arttyrý aýyr jol-kólik oqıǵalaryna ákeletin negizgi faktorlardyń biri bolyp qala beredi. Ortasha jyldamdyqty baqylaý júıesi kamera aldyndaǵy bir rettik jyldamdyqty ǵana emes, júrgizýshiniń búkil jol ýchaskesindegi naqty qozǵalys mánerin anyqtaýǵa múmkindik beredi, — delingen habarlamada.
Júıe kólik quralynyń belgili bir aralyqty qandaı jyldamdyqpen júrip ótkenin esepteıdi. Mundaı tásil júrgizýshiniń tek kameranyń aldynda ǵana jyldamdyqty azaıtyp, keıin qaıtadan qaýipti deńgeıge deıin údetýine jol bermeıdi.
QazAvtoJol jyldamdyq rejımin buzýdy avtomatty túrde tirkeý respýblıkalyq avtojoldardaǵy apattylyqty tómendetýge baǵyttalǵan aldyn alý sharalary aıasynda engizilip jatqanyn málimdedi.
— Qozǵalys qarqyndylyǵy joǵary aqyly ýchaskelerge erekshe nazar aýdarylady. Sebebi mundaı joldarda jyldamdyq rejımin saqtaý barlyq jol qozǵalysyna qatysýshylardyń qaýipsizdigine tikeleı áser etedi, — dep habarlady kompanııa.
QazAvtoJol júrgizýshilerdi sapardy aldyn ala josparlaýǵa, «Eń joǵary jyldamdyqty shekteý» jol belgileriniń talaptaryn saqtaýǵa jáne belgilengen jyldamdyq rejımin asyrmaýǵa úndedi.
Eske salaıyq, buǵan deıin kompanııa joldardaǵy jańa «aqyldy» kameralardyń ne úshin ornatylyp jatqanyn túsindirgen edi.
