10 sáýirge deıin Konstıtýtsııa jappaı taralymmen basyp shyǵarylady

ASTANA. KAZINFORM — Mádenıet jáne aqparat mınıstrligi jańa Konstıtýtsııanyń normalary boıynsha aqparattyq-túsindirý jumystarynyń josparyn ázirleýi tıis. Búgin Úkimet otyrysynda Premer-mınıstr Oljas Bektenov osyndaı tapsyrma berdi. 

— Jańa Konstıtýtsııada memleket pen qoǵamnyń ornyqty damýyna berik negiz bolatyn normalar men erejeler túgel qamtylǵan. Birinshiden, jańa Konstıtýtsııanyń normalary boıynsha aqparattyq-túsindirý jumystaryn jandandyrý qajet. Osyǵan baılanysty Mádenıet jáne aqparat mınıstrligine bir apta ishinde tıisti aqparattyq jumys josparyn ázirleýdi tapsyramyn, — dedi Úkimet basshysy.

Onyń aıtýynsha, 2026 jyldyń 10 sáýirine deıin Konstıtýtsııany jappaı taralymmen basyp shyǵaryp, memlekettik organdarǵa, bilim berý, mádenıet uıymdaryna, kitaphanalar men saýda oryndaryna jetkizý kerek.

— Tsıfrlyq damý mınıstrligi Konstıtýtsııa mátinin qoljetimdi elektrondyq platformalarda ornalastyrýdy qamtamasyz etsin. Bilim berý salasynda mektepterde, kolledjder men ýnıversıtetterde Konstıtýtsııa erejeleri boıynsha oqý sabaqtaryn ótkizý kerek. Ol úshin Oqý-aǵartý, Ǵylym jáne joǵary bilim mınıstrlikterine 20 sáýirge deıin tıisti ádistemelik nusqaýlar men oqý-ádistemelik quraldaryn ázirleýdi tapsyramyn, — dedi ol.

Premer-mınıstr Konstıtýtsııada medıtsınalyq kómekti qarjylandyrý kózderin keńeıtý, onyń ishinde bıýdjetten tys qarajatty tartý múmkindigi bekitilgenin atap ótti.

— Bul osy júıeniń barynsha turaqty ári ıkemdi bolýyna jaǵdaı jasaıdy. Saqtandyrý paketi josparly jáne joǵary tehnologııalyq medıtsınalyq kómektiń kóptegen túrlerine qol jetkizý quralyna aınalady. Bıylǵy 1 sáýirge deıin Densaýlyq saqtaý mınıstrligi Ádilet mınıstrligimen birge qoldanystaǵy zańnamaǵa qajetti túzetýlerdi Parlamentke engizýdi qamtamasyz etsin, — dedi Oljas Bektenov.

Aıta keteıik, Úkimet jańa Konstıtýtsııa normalaryn júzege asyrý joldary talqylandy.