10 ret ereje buzǵan ózbekstandyqtar endi kólik basqarý quqyǵynan aıyrylýy múmkin

TAShKENT. KAZINFORM – Ózbekstannyń Іshki ister mınıstrligi jol erejesin elemeıtin júrgizýshilerge qoldanylatyn jazany qatańdatýdy usyndy, dep habarlaıdy Kazinform agenttiginiń menshikti tilshisi.

Tıisinshe, vedomstvo Ózbekstannyń ákimshilik jaýapkershilik týraly kodeksine túzetý engizýge baǵyttalǵan zań jobasyn ashyq talqylaýǵa shyǵardy. Qujatqa saı, endi júrgizýshi bir aı ishinde 10 ret jol erejesin buzsa, onda ol 6 aıǵa kólik basqarý quqyǵynan aıyrylýy múmkin.

Atap aıtqanda, baǵdarshamnyń tyıym salý belgisin elemeı ótip ketse, qarsy baǵyttaǵy jolaqqa tússe, jyldamdyqty shekti mejeden (ruqsat etilgen oryndaryna baılanysty jyldamdyq saǵatyna 40 nemese 60 shaqyrym) asyrsa, onda usynylyp otyrǵan jaza qoldanylady.

Sondaı-aq, bir aıda júrgizýshi 2 ret qarsy baǵyttaǵy jolaqqa tússe, baǵdarshamnyń qyzyl túsine ótip ketse nemese jyldamdyqty 5 ret asyrsa, oǵan bir jyl boıy aıyppuldy 50% jeńildikpen tóleý múmkindigi berilmeıdi.

Іshki ister mınıstrligi keltirgen derekke saı, alǵashqy jartyjyldyqta respýblıkada 3 286 jol-kólik oqıǵasy bolyp, saldarynan 894 adam qaza tapqan. Al byltyr elde jol erejesin buzýdyń 24 mıllıon faktisi tirkelgen.

Eske salaıyq, buǵan deıin Ózbekstanda avtobýs jolaǵyna túsken kólik júrgizýshilerine aıyppul salynýy múmkin ekenin jazyp edik.

Byltyr mas kúıinde kólik basqarǵan 31,3 myń ózbekstandyq ákimshilik jaýapqa tartyldy.

Sondaı-aq, 2024 jyly Ózbekstanda jol apatynan 2 myńnan astam adam qaza tapty.

Buǵan qosa, taıaýda kólik keptelisinde uzaq turǵan Ózbekstan prezıdenti mınıstrdi synǵa alǵan edi.