10 paıyzdyq kórsetkishpen óndiris órkendemeıdi - medıtsına
ASTANA. QazAqparat - Búginde elimizde farmatsevtıka salasyna baılanysty másele kóp, otandyq salanyń aldyǵa ilgerlegeni baıqalmaıdy.
Elbasynyń ózi osyǵan erekshe kóńil aýdaryp, aldaǵy ýaqytta farmatsevtıka óndirisin damytý maqsatynda ishki suranystyń 50 paıyzyn otandyq dári-dármek óndirýshiler esebinen qamtamasyz etýge tapsyrma da bergen-di. Prezıdent, sonymen qatar, syrttan satyp alynatyn dári-dármekterdiń sapasyna qatań baqylaý bolýy tıistigin de qadap aıtqan. Dári-dármekke qatysty ishki suranystyń 50 paıyzyn otandyq dári-dármek quraı almaı otyr. Farmatsevtıka salasynda otandyq óndirýshiler úlesi 10-aq paıyz eken. Qalǵan 90 paıyz ónim shet eldiki.
Otandyq naryqta Úndistannan, Germanııadan, Túrkııadan, Qytaıdan, Reseıden kelgen dárilerdiń qaptap ketkeni sonshalyqty, el arasynda tek, sol elderdiń ónimine degen senim paıda boldy. Quddy bir ózge elden kelgen, baǵasy qymbat dáriler ǵana dertimizden aıyqtyratyndaı. Al, 10 paıyzdy quraıtyn óz ónimderimizge «Arnaıy saraptan ótpegen, sapasy belgisiz» dep shekeden qaraımyz.
Basy aýyryp, baltyry syzdamaıtyn jan joq. Rasymen de, sońǵy 10 jyldyń ishinde dárilik zattardy tutyný Qazaqstanda halyqtyń jan basyna shaqqanda 4 esege, ıaǵnı, 20 dollardan 81 dollarǵa deıin ósken eken. Osynyń ózi elimizde dári-dármek saýdasynyń qyzyp turǵanyn ańǵartady. Jasyratyny joq, syrqat jannyń dertine daýa bolarlyq dáriniń san myńdaǵan túri búgingi dárihanalardyń sórelerinde samsap tur. Іzdegen dárińdi aıaq sharshatpaı-aq tabasyń. Ókinishtisi, barlyǵy derlik shet elden satyp ákelingen dármekter. Baǵasy da qymbat.
Sapasynyń qanshalyqty ekeninen múldem habarymyz joq. Sonda da dertimizge shıpa bolar degen úmitpen satyp alamyz. Osy bir tusta, kez kelgen qazaqstandyqqa «óz ónimim ózgeden artyq» degen prıntsıp kerek sııaqty. Talapqa saı bolmasa otandyq dári-dármekte óndiriske jol tartpas edi.
